La Usc di Ladins

Fajeme lezit portèr dant na curta prezisazion sun chel che à scrit la stampa en cont de la sentèda del Consei General stata en jebia ai 17 de messèl. Fae referment en particolèr a la discuscion sutèda fora dintornvia la nomina de Tea Dezulian a Presidenta del Consei General, nomina che zachei à criticà per via che la medema à jà l'encèria de Presidenta del Istitut Cultural Ladin, »ent scientifich che dovessa stèr fora dai jeghes politics«: coscita l é stat argomentà da pèrt de la mendranza.

Son stat tirà te anter, dessema col dr. Antone Pollam, per contrabater dijan che »ti egn passé no l'ì é mencià ocajions olache anter i candidac de la UAL l era l diretor o l president del Istitut«, con dret referiment a la litazions provinzièles dal 2008. L é ben cert cogner ge spieghèr a n profescionist de la politica che n cont l é l derit costituzionèl a se candidèr te na elezion provinzièla (te nosc cajo te n zircol uninominal), e ben auter cont l é tor sù – n'outa jita en port la litazion – na encèria istituzionèla che va a se sorapeèr a n'autra jà en doura, a cef de n ent culturèl che per sia natura aessa dassen da restèr 'indipendent'. L fat é amò più scherpent se se conscidra che ence l vizepresident del Istitut, prof. Bernardino Chiocchetti, à giusta tout su l'encèria de conseier de procura con competenzes apontin tel ciamp de la cultura ladina: ma che volede jir a dir? Coscita va l mondo anchecondì: l 'conflit de interesc' l é da pez jit fora dal orizont de l'etica politica.

Nia che ge somee l é mai sozedù, per chel che me revèrda, ti egn passé, egn olache é dat cors al sacrosanto derit de tor pèrt a la vita publica, zenza mai risièr sorapeamenc encompres de carater istituzionèl. É ben proà a ge spieghèr al cons. Guglielmi che enlouta del 2008, se mai se aessa dat l'eventualità de vegnir lità (cossa del rest nience da pissèr da dalonc), l intendiment l era chela che me aesse demetù: no da diretor, ma da Conseier provinzièl. La mia l era na candidatura de sostegn, per sepontèr n projet politich che etres aessa portà inant con maor competenzes e capazitèdes. Coscita se rejonèa te chi egn oramai tant dalonc, canche la politica era amò entenuda desche servije.

Fabio Chiocchetti del Goti, militant ladin  (Fabio Chiocchetti del Goti, militant ladin)