La Usc di Ladins

Cuestiun trafich: presc vigni de é Badia y Gherdëna sofoiades dal trafich de transit che vëgn dales valades dlungia por jí sö por i jus, jus danter regiuns che ne pó nia ester stlüc, ajache ai rapresentëia n coliamënt danter regiuns che por la costituziun taliana ne pó nia ester oget de impedimënc. Dit cun d'atres parores: por podëi stlü i jus y impedí na certa sort de trafich mësson avëi na alternativa. L'alternativa sensada é chëra de n coliamënt te tera. Canche la pert plü lungimiranta dla politica ladina á fat propostes de chësc veres, é saltada ite la politica de govern che á ince sfruté val' movimënt ambientalist de bona orenté mo cun pücia capazité da ciaré tl dagní. Al mancia i scioldi? Intratan él gnü le PNRR, la poscibilite da organisé i mondial de schi tla Ladinia, y nia inultima les Olimpiades. Chiló indere á nüsc rapresentanc a Balsan dormí y s'á lascé sciampé döt. Cun n conzet de mobilité modern tres coliamënc te tera danter les valades ladines y la stlüta di jus (che podess ti ester dedicá ales rodes, che adorass sambëgn ince les infrastrotöres te val), ne sofiasson nia sëgn sot le trafich te n dejordin total olache te ciafes sön strada de vigni sort y olache la mobilité publica cun architades a mesa strada impifa ciamó deplü.

Al é gran ora da se dé na descedada...

Albert Pizzinini, La Ila