Dal 1946 sön le Ju dal Sela á i Ladins dles 5 valades ieré la reunificaziun aministrativa con la Provinzia da Balsan. Vigne ann encër i 14 de messé vëgnel tigní na festa por recordé cösta gran encuntada. La festa é na desmostraziun che la mendranza ladina vir ince sce ara é ciamó entres despartida te trëi provinzies y döes regiuns.
Te cösta ocajiun él ince dërt da onoré chës porsones, co se dá da fá con empëgn y dediziun por le lingaz ladin y la cultura ladina.
Mo dles ieranzes portades dant pa chë encuntada dan 79 agn él romagnü bën püch y nia. Nostes autorités politiches de vigne livel fej de bi intervonc co sona bun y vá a cör, al vën baié trep mo dit püch. Certes cuestiuns desco la reunificaziun, orüda da na gran maioranza dal referendum de Soramunt dal 2007 ne vën o ne pó nia gní anunziades, gnanca plü dai Ladins enstësc, ciodi che bonamonter ti sóneres rio a chës istituziuns ince ladines co se tëm da müdé le »status quo«.
La De dla unité ladina é y romagnará porchël tal dagní na festa folcloristica, na bona ocajiun da s'encunté sonza fá ieranzes massa vaigades y olache al vën danter l'ater azeté che le travert fascist "divide et impera" é gnü arjunt definitivamonter.
Marco Pizzinini, Al Plan de Mareo
