La Usc di Ladins

Rua la DoloMyths Run
Dai 15 ai 17 de messèl la valèdes ladines ge dèsc alberch a 4 competizions de corsa sa mont con passa 1200 atlec enscinué
En vender ai 15 l é la Vertical Kilometer che ponta via Ciasates ta Dèlba envers Crepa Neigra: 2 chilometres e mez erc, che va en aut de 1000 metres.
En sabeda ai 16 l é la dopia endesfida entorn l Sela. La Val Badia ge dèsc l start a la garejèdea SellaRonda Trail Running. Beleche 60 chilometres per serèr la ronda da Corvara a Corvara, con 3580 metres de dislivel positif. Chi che vel na proa mingol manco senestra, i pel scomenzèr a Cianacei, taan l percors più o manco de mez: col medemo travert badiot, la Half conta 25 chilometres per 1700 metres de dislivel. En domenia la 24^ edizion de la Skyrace. Cianacei-Piaz Marconi, jouf de Pordoi, Sforcela, Piz Boé e deretorn da la Val Lasties: 22 chilometres con 1750 metres de dislivel positif. Se pel veder la garejèdes ence en streaming sui media del event. DV

Finissage dl simposium sun Renon
Duman sada ai 16 de lugio dala 16:00 inant sun Renon
Coche barat culturel cun i:la artisć:tes dl Renon iel unì metù a jì chëst ann l simposium »GemEinsam Spinnradfahren« dla Lia Mostra d’Ert pra l luech da paur Wiesenhof a Kloben­stein (Streda Kemater 21). Arnold Holzknecht, Ivo Piazza, Aron Demetz, Markus Delago, Sophie Eymond, Leonora Prugger, Felix Mahlknecht, Céline Silbernagl, Diego Perathoner y Valeria Stuflesser à abù la ucajion de se cunfrunté cun chëla luegia y crië opres tla maniera plu desferënta.
I lëures unirà prejentei pra la finissage duman sada ai 16 de lugio dala 16:00 inant. Dala 19:00 inant saràl pona da audì mujiga dal vif, cun »Il湾 Rock Trio«, Gogo Ponies, Mr. Intech, Donnie (Vinyl) Patschugo Sound­system y CYCLOP.

Dessënies y poejies de Klaus y Nadia Rungger
Giaurida dla mostra n vënderdi, ai 22.07 dala 20:00 tl Lanserhaus a San Michiel/Eppan
L’esprescion y l’energia se abina tl cë dla persona: i dessënies de Klaus Rungger desmostra forza y ntimità y ie sibe jughënc che sceri. Nadia Rungger ti va do a chësta sensazions te si poejies per ladin y tudësch, chiran l cunfin danter dalonc y daujin.
Ntroduzion de Valentine Kostner, mujiga cun Linda Rungger.
La mostra resta davierta dai 22.07. nchin ai 31.07. via per l’ena dala 15:00 nchin la 19:00 y n sada y dumënia dala 10:00 nchin la 12:00 y dala 15:00 nchin la 19:00. Ntreda debant.

Mostra de Elisabeth Frei
»Nun sag, wie hast du’s mit der Religion?« ie l titul dla mostra che sarà da udëi tla Kommende de Lengmoos, sun Renon. La vernissage ie ai 16.07. dala 17:00, ulache l rujenerà Leo Andergassen
Elisabeth Frei à tëut su la dumanda de Gretchen tl Faust y nvieia śën dutes chëles y duc chëi che ti cëla a si opres, lauredes ora te na maniera drët espresciva, de se fé n pensier de coche ëiles y ëi veija la religion, de coche ëiles y ëi pënsa persunalmënter n chësc cont.
La mostra resta davierta dai 16.07 nchin ai 14.08., de mierculdi, vënderdi, sada y dumënia, dala 16:00 nchin la 18:00.

Curs da soghé al palé
A La Ila vëgnel tigní n curs por mituns dles scores elementares
La Uniun Sport Alta Badia mët a jí n curs da soghé al palé por mituns dles scores elementares, tigní da Ubi Valentini. Al mët man en lönesc ai 18 de messé dales 15:00, tl ciamp dal sport a La Ila. Le curs jará spo inant por indöt 10 incuntades. Les iscriziuns vëgn tutes sö diretamënter pro la pröma incuntada.

»Nos dai strudli«
Le strudl te dötes sües variaziuns é le protagonist dla manifestaziun »Nos dai strudli«, che vëgn tignida fora por le zënter da San Linert a Badia, ai 19 de messé dales 19:00 inant
Önesc coghi y conditurs de deplü hotí y restoranc de Badia interpretëia do süa fantasia y so stil chësta spezialité locala. Les variaziuns de strudl duc y saré gnará sorvides adöm a n bun gote de vin de Südtirol fora por la strada prinzipala da San Linert, che vëgn por l’ocajiun stlüta al trafich dales 18:30 ales 23:00. Le grup »Jam’son« fistidiëia dl intratignimënt musical. Por tó pert a »Nos dai strudli« n’ól ester degüna prenotaziun y an pó cumpré i bons por i strudli bele danfora, ti ofizi turi­stics dl’Alta Badia o diretamënter en chë sëra tl zënter da San Linert. La manifestaziun é gnüda reconesciüda iniann sciöche »Going green event«, n evënt olache an ciara da ti dé gran importanza ala sostenibilité y al’ecologia. Sce al foss bur’ tëmp, vëgn la manifestaziun spostada ai 20 de messé.

Sonns tla natöra
Incuntada de meditaziun y relassamënt cun i sonns dl gong, amesa la natöra da La Crusc
Chësc isté gnarál metü a jí dui apuntamënc de meditaziun y relassamënt acompagná dal sonn dl gong, tla bela culissa naturala da La Crusc a Badia. Ara se trata de na sesciun de massaje dl sonn tres le stromënt dl gong, dles ciampanes tibetanes y de d’atri stromënc, che porta i partezipanc te na fasa de meditaziun y relassamënt. Na bona ocajiun por se tó tëmp por se instësc y passé n danmisdé alaleria amesa la natöra. Le pröm apuntamënt é söl program en lönesc ai 18 de messé sura la staziun a munt dl lift »La Crusc1«. L’incuntada mët man dales 11:00 y döra za. 1 ora. L’apun­tamënt cun i »Sonns tla natöra« gnará pité ciamó n iade le lönesc ai 8 d’agost. Les preno­taziuns al cost de 10,00€ é da fá ti ofizi turistics dl’Alta Badia anter le de denant, o sön la plata internet www.altabadia.org .

Mostra de Matthias Sieff
L’artist da Mazin mët fora sü laurs tl Istitut Ladin Micurá de Rü a San Martin. La daurida é en vëndres ai 22 de messé dales 18:00
Pisc enorms y che stá jö bel ia por tera é l’essënza daldöt mondana dles figöres che Matthias Sieff presentëia te süa mostra tl Istitut Ladin Micurá de Rü a San Martin; chisc pisc ingrandis te na manira esagerada ti dá stabilité ales scoltöres, ai é sües fondamëntes y á sciöche tai le compit da tigní sö n corp sterch y corpulënt, cun i brac che ti vá do a süa forma y n ce söinsom.
Matthias Sieff é nasciü a Ciavalëis (TN) tl 1982, al á arjunt le diplom de Maester d’ert (seziun scoltöra dl lëgn) pro la Scora d’ert de Sëlva te Gherdëna y dl 2006 la laurea te »Arti applicate«, seziun Scoltöra, tl’Université da Viena. La daurida dla mostra é en vëndres ai 22 de messé dales 18:00 tl salf dl Istitut a San Martin. Iló ésera da odëi spo cina ai 7 d’agost, dales 10:00 ales 12:00 y dales 15:00 ales 19:00.

Jöbia de Corvara: aperitif cun l’ert ladina
La Jöbia de Corvara sará dedicada ince chësc isté al’ert ladina. En ocajiun di dui apuntamënc

• 
•  

View the embedded image gallery online at:
https://www.lausc.it/manifestazions-y-evenc/20246-manifestazions-atuales-speziales#sigProId2a2644d61f

preodüs sarál deplü artisć locai che presentëia sües operes d’ert y che sona o cianta
La Jöbia de Corvara é n domisdé rich d’ert, te chël che an pó se gode n bun aperitif ti locai dl zënter de Corvara, stlüt al trafich dales 17:00 ales 22:30. Prö le pröm apuntamënt la jöbia ai 21 de messé podarán ascuté sö le sonn di corns da munt dl trio »Sassongher«, tratan che Oswald De Giovanni mostra sciöche an fej da ti dé cun la scoriada y cunta ince dles tradiziuns ladines. Ermes Costa cun i orghi da man y sü scolars fistidiará dl intratignimënt musical, l’artejan Hubert Pezzei da Lungiarü mostra l’ert dl ziplé le lëgn. I plü pici pó se devertí pro le stont dai jüc o pro Irma y Anneliese che ti depënj sö le müs cun les formes y les figöres che ai se chir fora (cina ales 19:00). La manifestaziun vëgn tignida dales 17:00 ales 20:00 y gnará ciamó n iade metüda a jí ai 18 d’agost.

Musiga por oboe
Le Festival Badiamusica pîta ai 17 de messé n conzert tla Val dl’Ert a San Martin. Da aldí él l’ensemble »La petite écurie«
»La petite écurie« é l’ensemble che tignará conzert en jöbia ai 17 de messé dales 17:00, tla Val dl’Ert a San Martin de Tor. Pro chësta sëra metüda a jí tla cornisc dl Festival Badiamusica y en colaboraziun cun SMACH, sarál da aldí Miriam Jorde Hompanera y Valerie Colen ala oboa baroca, Marc Bonastre Riu ala taille de hautbois, Giovanni Battista Gra­ziado al fagot baroch y Philipp Lamprecht ai tambürli storics. Ai pitará musiga fora da so album »Music for oboe band at the court of Anne Stuart«, plü avisa composiziuns de James Paisible, Godfrey Finger y Henry Purcell. Sce al ess da ester bur’ tëmp, vëgn le conzert tigní dala medema ora sön paiun d’Al Plan.

Conzert cun le »Horntrio«
Schumann, van Beethoven, Koechlin y Brahms: de sües operes é da aldí pro n conzert ai 20 de messé a Badia
Lylly Osann ala vi­dora, Egon Lard­schneider al corn y Judith Piccolruaz al clavier. Chisc é i pro­tagonisć dl »Horn­trio«, che é da aldí en gaujiun dl Festival Badiamusica 2022, plü avisa en mercui ai 20 de messé dales 21:15, tla Ciasa Run­cher a Badia.
Söl program dla serada él le »Adagio und Allegro As-Dur op. 70« por corn y clavier de Robert Schumann, la »Sonate G-Dur, op. 30 nr. 3« por vidora y clavier de Ludwig Van Beethoven, i »Quatre Petites Piéces« por corn, vidora y clavier de Charles Koechlin y le »Trio Es-Dur, op. 40« por corn, vidora y clavier de Johannes Brahms.

»Intratignimënt« sön l’orghe da La Ila
En lönesc ai 25 de messé dales 21:15 él da aldí te dlijia da La Ila l’organist Mirko Ballico, che porta dant n repertore de musiga che n’é nia preodüda por fins liturgics
Mirko Ballico presentëia sön l’orghe dla dlijia da La Ila operes dl 18ejim secul, de componisć sciöche Druckenmüller, Mozart, Haydn, Bach, y Walther. Cun chësc program ón presenté musiga d’orghe che n’é nia preodüda por fins liturgics. An pó dí che ara se trata de n program de »intratignimënt«, olache an alda conzerc dla perioda dl baroch y toc fora dla perioda classica. Le program s’adatëia bun ai registri dl orghe da La Ila y fej resalté suradöt sües carateri­stiches.

Sonns dal’Armenia cun le »Naghash Ensemble«
L’ensemble dal’Armenia porta dant i »Songs of Exile« dl componist american – armen John Hodian, ai 28 de messé a Corvara
Le Festival Badiamusica 2022 pîta en jöbia ai 28 de messé dales 21:15 n conzert particolar, te salf dles manifestaziuns da Corvara. Sön paladina se presentëia le »Naghash Ensemble«. Le grup é formé da Hasmil Baghdasaryan y Tatevik Movsesyan (sopran), Arpine Ter-Petrosyan (alt), Tigran Hovhannisyan (dhol), Aram Nikoghosyan (oud), Harutyun Chkolyan (duduk) y John Hodian (composiziuns piano). Ai portará dant i »Songs of Exile« de John Hodian – toc che forma na meditaziun sota danter la relaziun dla porsona cun Idî – dala prospetiva dl prou y poet armen dl 15ejim secul Mkrtich Naghash, che á passé tröc agn de süa vita tl esil.