La Usc di Ladins

Na cascada de saus
En mertesc ai 23 d’agost vëgnel metü a jí la manifestaziun gastronomica »Na cascada de saus«, tla cornisc particolara di saltadus dl Pisciadú a Calfosch
En ocajiun de chësc apuntamënt, che vëgn tigní jödapé ti saltadus dl Pisciadú, á i amanc dla munt y dla gastronomia la poscibilité da passé n domisdé n pü’ atramënter, cun de bona musiga y se lascian vizié dales spezialités gastronomiches amesa la natöra ite. Al gnará pité deplü speziaries tradizionales sciöche tutres y fortaies, bales da polënta y ciajó, pasta ai fonguns y costëis de porcel, arjignades ca da strotöres y coghi dl post. »Na cascada de saus« mët man dales 11:30 y döra cina ales 18:00. Ara gnará abelida dales melodies de Annika Borsetto y Vic&Daniel. L’evënt á ince ciafé la zertificaziun de »Going Green Event«, deache la manifesatziun vëgn fata respetan criters de sostenibilité y ecologia. Sce al foss bur’ tëmp, vëgn la manifestaziun spostada ai 26 de agost.

»Le bosch – süa richëza y gestiun«
Chësc é le titul dl liber de Gottlieb Moling, che vëgn presenté en vëndres ai 26 d’agost dales 20:00, tl salf dles manifestaziuns a La Val
Le liber de 400 plates trata deplü aspec sura le bosch (funziuns, ecosistem, flora y fauna, gestiun, prighi, laur te bosch y le lignan). Dlungia chëstes informaziuns vëgnel ince dé informaziuns sura i bosć tl monn, coriosités desvalies y impulsc de pedagogia dl bosch.
Sön passa 70 plates vëgnel porté na terminologia spezifica te deplü lingac cun zirca 2.000 parores ladines y 9 dessëgns botanics/anatomics.
Passa 220 dessëgns a corusc de Simonetta Varchetta fej le liber rich y plajor por pici y gragn.
Le liber vëgn presenté le vëndres ai 26 de agost dales 20:00 tl salf dles manifestaziuns a La Val.
Moderaziun de Pablo Palfrader y cornisc musicala.

Momënc ladins
La manifestaziun »Momënc ladins« vëgn organisada por le pröm iade ai 21 de agost a La Val, un di paisc olache an pó vire gran pert de nosta cultura ladina da paur
La manifestaziun mët man dales 9:00 pro le ciamp dal sport a La Val, y se destënn fora por döt le paisc, olache an incuntará jënt dl post che zipla tl lignan, siëia i prá y arjigna ca smalz y ciajó. Por l’ocajiun gnarál ince organisé na spazierada por families fora por les viles, olache an podará imparé cosses nöies sön la cultura, la tradiziun y les spëises ladines. Pro deplü stonc podarán ciarcé spezialités ladines, pitades en colaboraziun cun la jönëza da paur, la musiga dl paisc, les patrones y l’Uniun di paurs da La Val. Al ne manciará nia intratignimënt musical y n program de devertimënt por mituns. Por tó pert n’ól ester degüna prenotaziun.

Gran final cun le »Alea Ensemble«
L’ultim conzert por

• 
•  

View the embedded image gallery online at:
https://www.lausc.it/manifestazions-y-evenc/20623-manifestazions-atuales-speziales#sigProId48efd6fd3a

le Festival Badiamusica 2022 vëgn tigní en sabeda ai 20 d’agost te dlijia da La Val
Le »Alea Ensemble« é protagonist dl ultim conzert dl Festival Badiamusica de chësc ann, söl program en sabeda ai 20 d’agost dales 21:15 te dlijia da La Val. Da aldí sarál Josef Feichter al fabló, Lukas Runggaldier ala oboa, Margareth Huber ala vidora, Ingrid Gantioler al fagot y Sigisbert Mutschlechner al orghe. I cin’ musizisć, che á scialdi düc fat esperiënzes pro orchestres de pëis internazional, portará dant chësc repertore: La »Sonata B – Dur« de Johann Friedrich Fasch, le »Trio B – Dur« de Giuseppe Ferlendis, le »Cinquieme concert La forqueray« de Jean – Philippe Rameau, le »London Trio 1« de Joseph Haydn, le »Maestoso F – Dur« de Josef Gabriel Rheinberger, la »Sonata in tre g – moll« de Georg Philipp Telemann y le »Concerto sol minore« de Antonio Vivaldi.

Mara Miribung: »Sad Songs for a Crocodile«
Finissage dla mostra de Barbara Tavella tl Tublà da Nives te Sëlva, ncuei vënderdi ai 19.08. dala 20:30
Ntan che la vita ti à desdrù l cuer, à Mara Miribung passà la majera pert dla prima gran stluta tl liet. Dantaldut a bradlé. Legrimes de cocodril plutosc grandes.
Canche la ova capì che se nciurnì cun alcol y tabach ne fova deguna soluzion, àla scumencià a scrì n valguna cianties. Danz–ma nia da se fé marueia – cianties trangujedes. Na lauda ala melancunia. Na stima ai cueres sfruziei. N valguna gotes. Mpue de humor.
Aspitëve na performance ju de corda (ma nia mé) de Mara Miribung. Mé per chiche che ie plu da snait.

30 ani Orchestra Sonoton Gherdëina
Doi i cunzerc per festejé chësc iubileum, n vënderdi ai 26.08. y n dumënia ai 28.08. dala 21:00 sun Plaza de Chemun de Sëlva
»Music shapes generations«. Chësc l titul di doi cunzerc pra chëi che n jirà de reviers tla generazions y puderà audì pec desferënc coche per ejëmpl »Variationen über ein Thema von Haydn« de J. Brahms, »The Complete Harry Potter« de J. Brubaker, »Argentaria« y »All generation’s lead to Orchestra Sonoton Gherdëina«, doi opres scrites dal cumposidëur y musizist Matthäus Crepaz. L cunzert ie sot ala bachëta d’Alex Designori.
Chertes pòssen cumpré dan i cunzerc o se lascian scrì su danora tl ufize dla Lia dl Turism de Sëlva, al numer 0471 777900.
L’Orchestra se ncunforta sun Vosc unì per festejé deberieda i trënt’ani de atività dl’Orchestra Sonoton Gherdëina.

»fiat lux«: vigni mertesc cun conzert
Tla Engelsburg a Neustift, pert dl convënt dër conesciü che festejëia en chësc ann i 880 agn de vita, él da odëi le tritich de tesć sacrai cristians, musiga y pitöra. Le proiet é davert vigni de, aldefora dles domënies, dales 10:00 ales 17:00. Le conzert dl cor moscedé sot la direziun de Ludwig Rindler é söl program vigni mertesc dales 16:00
L’EPL presentëia tla Engelsburg a Neustift cina ai 6 de setëmber 2022 la mostra cun draps intënc y musiga ciantada dal titul »fiat lux«. I draps é gnüs intënc dal artist Albert Mellauner, la musiga componüda dal maester Ludwig Rindler. L’idea, le conzet y la cerna di tesć fora dla tradiziun di convënc cristians por latin y ajuntes ladines dala liturgia contemporana é de Iaco Rigo.
Vigni mertesc dales 16:00 él söl program la presentaziun dla musiga originala da pert dl cor moscedé de set usc y percusciuns. Le conzert vëgn presenté vigni mertesc dales 16:00 cina le de dla finissaja programada por i 6 de setëmber 2022.
»fiat lux« interpretëia danü la sostanza dles ores de convënt (hores) sciöche secuënza de nüsc dis y nosta vita tla mainira dl movimënt di corusc intënc sön peza y tla sintesa di lalc tradizionai y dles cianties atuales de dlijia, la composiziun döra 25 menüc. Le proiet artistich é sostegní finanziariamënter dala Repartiziun dles Mendranzes dla Regiun Trentin–Südtirol.
L’entrada ai conzerc vigni mertesc dales cater domisdé é debann; daverta é la mostra vigni de (aldefora dla domënia) danter les 10:00 ales 17:00.

Orchestra cun premiera tla Val dl’Ert
En domënia ai 21 d’agost dales 17:00 él l’Orchestra Val Badia che tëgn conzert tla Val dl’Ert a San Martin. Danter i toc ince la premiera dla composiziun »Vaia« de Antonio Rossi
L’Orchestra Val Badia é na­sciüda l’ann 2009 y cumpëda incö 20 musizisć y musizistes dla Val Badia. Chësta domë­nia ai 21 d’agost dales 17:00 sarára da aldí pro n conzert tla Val dl’Ert a San Martin de Tor, olache al gnará soné toc musicai conesciüs, sciöche ince toc inedits. Pro chisc alda la composiziun »Vaia« de Antonio Rossi, che gnará portada dant por le pröm iade. La direziun é tles mans de Bruno Rives. Sce al ess da ester bur’ tëmp, vëgn le conzert tigní tl salf dl Istitut Ladin »Micurá de Rü«.