La Usc di Ladins

Calënder Ladin 2023
Al é le 62ejim numer anual tla storia dla »pratica ladina« tla Val Badia y gnará presenté en vëndres, ai 18 de novëmber 2022, dales 18:00 a San Martin de Tor
Le »Calënder Ladin 2023« presentëia aladô dla tradiziun i dis y les festes cun i sanc y planëc, n jop de retrac vedli tuc fora dales ciases dla valada, articui sön porsones, avenimënc y curiosités desferëntes, cunties y pinsiers. Lapró sarál ince da ciafé fotografies por i 20 agn dala canonisaziun de Ujöp Freinademetz a Roma, y dla prozesciun de Jeun stada chësc ann che vá plan plan a piz.
Le »Calënder Ladin 2023« gnará venü ince en chësc ann te plü botëghes y da ciasa a ciasa, al prisc de 15,00 euro. Ala presentaziun tla ostaria Da Nicl a San Martin de Tor sonará le ciantautur Arcangelo Obwegs.

Fascia protagonista te Biblioteca a Cianacei!
La Biblioteca de Cianacei é semper ativa. Endèna che va inant i corsc de ingleis per la comunanza, l’à endrezà na rassegna n muie enteressanta per cognoscer miec jent e fac de noscia tera!
La rassegna é scomenzèda con l’atleta paralimpica Chiara Mazzel e la va inant con etres trei encontres con Fascia protagonista.
Ve envion vigni mercol de november da les 18:00 te Sala de Consei del Comun de Cianacei.
- Ai 16: »Gran Vera e pera jent« n viac te la storia di sudé fascegn dessema a Cesare Bernard.
- Ai 23: »Pascalin Selfie, dal dagherotip al smartphone« na vida neva e curiousa de cognoscer Franz Dantone Pascalin, coi artisć Manuel Riz e Claus Soraperra che ge sporjarà ence n don a duc i partezipanc.
- Ai 30: »Fascegn a la foresta«, con Cesare Bernard e Claus Soraperra se rejonarà de la esperienzes di fascegn jic a se l vadagnèr foradecà ti moments de dificoltà.

Aministradëur de sustëni:

• 
•  

View the embedded image gallery online at:
https://www.lausc.it/manifestazions-y-evenc/21576-manifestazions-atuales-speziales#sigProId55fb75fca1

sëira de nfurmazion
L KVW de Urtijëi/Runcadic mët a jì na sëira de nfurmazions n con’ dl argumënt: »Aministradëur de sustëni: chi se cruzia pa de mi avëi canche ie ne son nia plu al’autëza?«
La sëira cun l aucat Elvis Costa sarà n n vënderdi ai 18 de nuvëmber dala 20:00 tla sala de calonia a Urtijëi. Duc y dutes ie de cuer nviei a unì a scuté su!

Teater »Te camping«
L’Uniun Teater La Ila é tl laur da arjigné ca le teater da ri »Te camping« (titul orignal »Bären«) de Frank Pinkus. Premiera en doman ai 12 de novëmber
Le teater che vëgn presenté a La Ila vëgn arjigné ca sot la rejia de Erika Castlunger, les löms de Luca Pizzinini. Sön paladina sarál da odëi: Ellen Alfreider, Marco Moscon, Daniele Pescoll­derung, Andy Pizzinini, Roland Pizzinini, Daniel Rubatscher, Sabine Rudiferia, Tobias Stam­pfer, Susann Tavella y Cindi Vittur. Les rapresentaziuns é: sabeda 12, domënia 13, mercui 16, sabeda 19 de novëmber dales 20:30, y domënia ai 20 de novëmber dales 15:00, dagnora tla Ciasa dla Cultura a La Ila. Prenotaziuns: 333 2525740.

Cunzert de Santa Zezilia
La Mujiga de Urtijëi nvieia al cunzert tradiziunel de Santa Zezilia, n dumënia ai 20 de nuvëmber dala 17:00 te Cësa di Cungresc a Urtijëi
Cun l cunzert fina via l ann de atività dla Mujiga de Urtijëi. L dirighënt Egon Lard­schneider à cris ora nce chëst ann n program drët nteressant, danter l auter la marcia »Attila ungarischer Triumphmarsch« de J. Fucik, la polka y finale ora de »die verkaufte Braut« y »Euphoria« de M. Scharnagl. Oradechël saràl da pudëi scuté su l pez solistich »Concertino für Flöte« de C. Chaminade, sunà da Katharina Lardschneider sun l flaut.
Tla segonda pert jiràla inant cun pec plu moderns coche la marcia »In the Hearth of Europe« de H. Pallhuber, »Dum Spiro Spero« de C. Pilsner y melodies ora dl Musical »Das Phantom der Oper«. Stlut jù vën l cunzert cun l pez »Pomp & Circumstance 4« de E. Elgar y aranjà da H. van Lijnschooten.
Duc y dutes ie nviei de cuer.

Torné de batadú tla Ütia de Pütia
Ai 25 de novëmber da sëra vëgnel carté por la secunda ediziun dl torné
Do le suzes dl ann passé, dala pröma ediziun dl torné de batadú tla Ütia de Pütia sön Börz, orunse ince en chësc ann indô ciafé fora che che é le miú, le plü fortuné o che che sá da sbordené zënza se lascé abiné! Ai 25 de novëmber dales 17:00 s’incuntunse sön ütia, la cartada mët spo man dals 18:00! Inviá a tó pert é düc sura i 18 agn! Le cost dl’iscriziun é de 10,00€ a ce cun cëna (spaghetada). Les boandes é da paié a pert. Cun 10,00€ lapró él la poscibilité da sté suranöt te nosta beliscima ütia y se descedé cun n bun gosté en compagnia.
Por les iscriziuns (a scuadra): scrí sön Whatsapp al 371 5688564 o na e–mail a samuel@jogn.org anter i 17 de novëmber. Tignisse lëdia chësta sëra! Nos nes confortun da s’odëi.

Marcé dl cufer a Corvara
En domënia ai 20 de novëmber dales 10:00 ales 17:00
Do dui agn de palsa sforzada, organisëia la Uniun dles Ëles da Corvara indô le marcé dl cufer, cun mostra y poscibilité da cumpré patüc fat a man.
Le marcé vëgn tigní en domënia ai 20 de novëmber dales 10:00 ales 17:00, tl salf dles manifestaziuns da Corvara. Al sará ince n pice renfrësch, cun spënora lëdia che jará a bëgn dl’assoziaziun Peter Pan.

Alpha Youth Series – Vita. Creidum. Sëns
Nce

• 
•  

View the embedded image gallery online at:
https://www.lausc.it/manifestazions-y-evenc/21576-manifestazions-atuales-speziales#sigProId55fb75fca1

chëst ann mët la Union Pasturela Gherdëina a ji diesc ancuntedes dla grupa Alpha Youth Series
Pra uni ancunteda saràl zeche da maië, n argumënt y grupes de descuscion. Na bela y bona ucajion per se ancunté danter jëuni:es y ciaculé y pensé do dla gran dumandes dla vita y dl crëidum.
La prima ancunteda sarà n vënderdi ai 18.11. dala 19:00 te calonia a Urtijëi y la sëires jirà inant a rotazion tla trëi pluanies de Gherdëina. I:la jëuni:es unirà partì su te doi grupes, una dai 13-15 ani y la segonda dai 16-18 ani. L priesc per duta la ancuntedes ie de 120€, te chëles che l ie laite la cëines y l material.
Per se nfurmé plu avisa vëniel metù a ji doi sëires: ncuei vënderdi ai 11.11. dala 20:00 te calonia de Santa Cristina y n duman sada ai 12.11. dala 18:30 ntan la mëssa di:dla jëuni:es tla dlieja de Urtijëi. Per plu nfurmazions pudëis cherdé su Claudia al 338 6406533 o ti scrì a alphagherdeina@gmail.com. Per se nuté su: forms.gle/KWJf7254x1Kwv3Lq6.

Edema dla Sanité te Mareo
Dai 14 ai 19 de novëmber é te Mareo indô la sanité al zënter, cun serades sön tematiches desvalies
I Consëis de Formaziun d’Al Plan, La Pli y Rina deboriada cun la Crusc Blancia Mareo mët a jí ince iniann l’Edema dla Sanité, che gnará desfirada dai 14 ai 19 de novëmber ti trëi paisc dl comun de Mareo.
Ega – fontana de sanité y medejina
Le pröm apuntamënt é en lönesc ai 14 de novëmber dales 20:00, te salf dla Cassa Raiffeisen d’Al Plan, cun le referat dl dr. Rudolf Gruber – dotur spezialisé de medejina dles ëres y aiüt da sté de pert, che se dá ince jö cun medejina tradizionala cineja y medejina naturala. Sot al titul »Ega – fontana de sanité y medejina universala«, baiarál dla faziun positiva dl’ega – che é fontana de vita, de nodrimënt y de sanité. Lapró gnarál ince porté dant esperiënzes tla medejina y aspec fora dles sciënzes naturales.
Por na odüda plü tlera
En mertesc ai 15 de novëmber dales 20:00 nen jarára te Ciasa dles Uniuns a La Pli de edli y dla odüda. Referënta é Sabine Schrott, che á studié Otica y Optometria a Verona y Bologna. Sot al titul »Akti­viere deine Sehkraft« baiarára dla odüda sot a aspec desvalis: co che l’alimentaziun influ­enzëia l’odëi y ci alimënc che ti fej bun o mal ai edli; ci mosöres de dejintossiamënt natural che pó avëi faziun positiva sön i edli; ci messaji che l’anima nes dá tres i desturbs dl odëi; ci produc che pó daidé por ti dé na sbürla positiva ales zelules.
I gramorins y so influs
Lorenzo Rumerio, chine­siologh y pranoterapist, é le referënt dla terza serada, en mercui ai 16 de novëmber dales 20:00, tl salf dles mani­festaziuns da Rina. Te chësta sëra sot al titul »Nächtliches Zähneknirschen« nen jarára de gramorins, plü avisa dl gran influs che i gramorins á sön tröpes perts dl corp. Tenjiuns, emoziuns y stres se lascia ince fora sön la musculatöra y i osc di gramorins. Le dër ecuiliber ti gramorins y na balanza energetica dëida influenzé positivamënter le corp, dij le referënt.
»Le mer che é te nos«
En jöbia ai 17 de novëmber dales 20:00 vára inant tl salf dla Cassa Raiffeisen d’Al Plan. Le dr. Aldo Marcocci baiará dl tema »Il mare che c’è in noi«. Plü avisa jarál ite sön tan importanta che l’ega é por la vita dla por­sona.
Ara fej fora la compo­nënta prinzipala de nosc corp y á funziuns vitales por so funzio­namënt. Tl referat gnarál ilustré le ziclus dl’ega te nosc organism, sües tröpes funziuns y co che an dess se comporté por mantigní na idrataziun adaldërt.
Spëisa por mituns y jogn
En vëndres ai 18 de novëmber dales 20:00, gnarál tigní te Ciasa dles Uniuns a La Pli n referat cun l’esperta de alimen­taziun Ivonne Daurú. Tema é »Spëisa por mituns y jogn«, olache ara portará dant 5 manires creatives por arjigné ca na spëisa sana por i jonins, cun rezëtes da se tó para y ince na picia degusta­ziun. La referënta se dá jö da tröc agn incá cun l’ali­men­taziun y arata important che la spëisa ne vëgnes nia ma odüda sciöche nodrimënt, mo ince sciöche n jüch danter influsc fisics, psicologics y soziai.
L’ultima sëra é la sabeda ai 19.11. a Rina. Plü detais cia­fëise tla proscima ediziun.

L Comun General ve envia a teater!
En vender ai 18 de november te teater de Cianacei prum apuntament de la rassegna, col grop »I Bontemponi« che festeja i 10 egn de atività
Uton temp de teater. Do che la era sutèda per Covid, rua endodanef la rassegna de teater del Comun General de Fascia. Na ocajion per se svampolèr e per se goder con cater compagnies de teater de la val.
I prumes a orir la coltrines sarà »I Bontemponi« che chest an festeja ence i 10 egn de atività. Te chisc egn se à mudà fora i comedianc, n é jit ite de neves e de etres à lascià aló, ma la gaissa de portèr dant de neva comedies e soraldut chela de fèr goder la jent la é semper grana. Per chest i se à pissà de festejèr sie cedean te chesta ocajion de la rassegna. En vender ai 18 de november da les 20.30 te teater de Cianacei e en domenia ai 20 da les 16.00 te tendon de Poza i met dant »I più bie regai no se i fasc ite mai« de Loredana Cont con la regia de David Dorich. En domenia do comedia duc é envié a se fermèr a magnèr castagnes.
La rassegna va inant coi atores de »La Mizacoles« da Ciampedel che en jebia ai 24 de november da les 20.30 te Oratorie de Moena e en domenia ai 27 da les 15.00 te teater de Ciampedel  porta dant »La tradida dessenèda« de Davide Arminio, regia de Loreta Florian.
Ai 2 de dezember da les 20.30 al PalaDolomites de Ciampestrin e ai 4 da les 15.00 te Oratorie de Moena sarà protagonisć »I Amisc del Teater« che portarà dant »A jiar col föch« test e regia de Ilaria Chiocchetti.
Sera su la rassegna »L Grop de teater Anter­moia«. Ai 16 de dezember da les 20.30 a La Gran Ciasa a Soraga e ai 18 da les 15.00 al PalaDolomites de Ciampestrin i met dant l toch »Centecincanta la gialina cianta« ispirà al test de Achille Campanile con adatament e regia de Michela Marangoni.

Menopalsa… y spo?
Tl Raiun sozio–sanitar Val Badia a Picolin vëgnel metü a jí na ligna de iniziatives sön la menopalsa, tematica tabu te nosta sozieté: ai 25 y 26 de novëmber y ai 2 de dezëmber 2022
Menopalsa… bëgn y spo? Dla menopalsa ne vëgnel nia ion baié. Al é un di gragn tabus de nosta sozieté. Cun menopalsa, o por todësch »Wechseljahre«, vëgnel definí chë fasa de vita dla ëra, olache le prozes produtif se destöda bel plan ia, o dit atramënter: les mestruaziuns stá bel plan fora. Chësc sozed aladô de statistiches danter i 45 y i 55 agn, mo é dër sogetif y depënn da n gröm de faturs, sciöche le trá do, o ince maraties yii. Te chësta fasa che döra de plü agn, vëgnel a s’al dé de plü cambiamënc a gauja dl mudamënt ormonal. Le corp cambia, an á te n colp i »cialc«, an é plü parentoses, an se stënta da dormí, tla relaziun cun le partner/om él cambiamënc suradöt a livel sessual. Döt chësc ne mëss nia ester, o miú: i messun imparé da vire chësc tëmp te n’atra manira, cun plü azetaziun de nos instësses y de nosc corp cun n’atra impostaziun de vita. Al mët man n’aisciöda nöia. Sëgn unse de plü tëmp por nos instësses, i podun lascé ia tröc fistidi, deache i mituns é bele gragn, i podun indô ti jí do a cosses che nes plej y che i un metü n pü’ sön na pert denant. Sëgn él le tëmp por cambiamënc, por sensaziuns nöies. L’ester informades dëida dër, bele por capí miú ci che cambia te nosc corp/te nosta psica y savëi ci che porta pro a nosc bëgnsté.
Tratan chëstes serades, che é dessigü ince interessantes por i omi/partners, gnarál baié de düc i aspec desferënc che á da nen fá cun la menopalsa, adöm a de plü espertes: la ginecologa Yvonne Fauster, la psicologa Angelika Fauster, la fisioterapista Anna Tolpeit, la doturia por reabilitaziun Elisabeth Pizzinini y la dietista Silvia Pitscheider.
Le vëndres ai 25 de novëmber dales 19:30, tl foyer d’entrada dl Raiun sozio-sanitar a Picolin, él sön le program le referat cun la ginecologa Yvonne Fauster y la psicologa Angelika Fauster, cun discusciun y pice renfrësch.
Le de do, la sabeda ai 26 de novëmber dales 9:00 ales 16:30, sarál te salf di Stödafüch a San Martin de Tor le workshop cun infor­maziuns, discusciuns, poscibilités da fá domandes, eserzizi por la osteoporosa, na marëna adöm y de vigni sort de consëis cun les espertes dla sëra da denant, adöm ala fisioterapista Anna Tolpeit.
Le vëndres ai 2 de dezëmber dales 19:30 él indô tl’entrada dl Raiun sozio–sanitar a Picolin la doturia por reabilitaziun Elisabeth Pizzinini che baiará de osteoporosa y de süa prevenziun, adöm ala dietista Silvia Pitscheider, che informará sön l’alimentaziun tratan la menopalsa.
I referac y le workshop sará por todësch. Por le workshop Ves periunse da ves prenoté anter i 24 de novëmber al 0474 524552. La partezipaziun é debann, la marëna se paia vignöna instëssa. Organisaziun: Comité de Raiun Val Badia.