La Usc di Ladins

Festa de Santa Maria dal ciüf a La Ila
Le paisc da La Ila se arjigna da organisé la festa de Santa Maria dal ciüf cun na defilada caraterisada dal titul »Sön munt«
En mertesc ai 15 de agost vëgnel tigní la tradizionala festa de »Ferragosto«, che mët man dales 11:30 tl zënter da La Ila. La marëna, cun spezialités ala grilia, polënta y tutres gnará acompagnada dales melodies dla Müjiga da La Ila. Dales 13:00 inant él i platleri dla Val Badia che presentará i bai tradizionai. La defilada tradizionala, dedicada chësc ann al tema »Sön munt«, mët man dales 14:30; al gnará rapresenté situaziuns dla vita te munt da inlaota cina aldedaincö. Al ne manciará nia rapresentaziuns de scenes sciöche sié y restelé sön munt, taié lignan, dormí tl fëgn, mangé sön munt, jí cun i schi y cun la roda y ince l’Aiüt Alpin Dolomites sön i ciars dles uniuns dl paisc. La defilada vëgn acompagnada dala Musiga da La Val, dala »Schützenkapelle Pichl-Gsies« y dala Müjiga da La Ila. Do la defilada pó düc ciamó se gode la musiga da Pichl-Gsies y da sëra sonará le grup »The Jam’son«. La festa vëgn organisada dai Stödafüch y dala Müjiga da La Ila, en colaboraziun cun la Cooperativa Turistica Alta Badia.


Isté

• 
•  

View the embedded image gallery online at:
https://www.lausc.it/manifestazions-y-evenc/24544-manifestazions-atuales-speziales#sigProId45e2d9526d

sön la dlacia
Atlec de livel internazional sciöche ince l’Ice Club Alta Badia mostrará n spetacul sön la dlacia, en jöbia ai 17 de agost tl stade a Corvara
En jöbia ai 17 d’agost dales 21:15 portará dant les jadinadësses y i jadinadus dl Ice Club Alta Badia n spetacul sön la dlacia dal titul »The Power of Music«. Lapró podarán ince odëi n valgügn atlec profescionisć sciöche Lara Naki Gutmann – campionëssa taliana, i dui pers dala Republica Ceca Natalie Taschlerova cun Filip Taschler y Katerina Mrazkova cun Daniel Mrazek, sciöche ince le per de jadiné artistich Anna Valesi y Manuel Piazza. I atlec conesciüs a livel internazional sciöche ince i atlec jogn dl post portará dant salc, figöres y spetacui acompagná da musiga y le grup de jadiné sincronisé »Ice Angels Team« gnará acompagné dales melodies dla vidora de Pierpaolo Forti. Les chertes d’entrada pón cumpré bele danfora tl ofize turistich da Corvara, sön la plata internet dl’Alta Badia, pro le stade dala dlacia o diretamënter la sëra dla manifestaziun, al prisc de 18,00€. Mituns sot a 10 agn pó ite debann.

Art, pascion e solidarietà
La sociazion »Mille Centrini« de Vich ve envia a veder sie picol marcià de benefizenza!
En domenia ai 13 de aost te la sala a pe pian de Ciasa Marmolada sun strada Rezia aur l picol marcià de benefizenza de la sociazion »Mille Centrini« de Vich, vidada da Christine Fontana. Per cater dis, enscin a en mercol ai 16, duc i domesdì da les 15:00 a les 19:00 se pel jir a veder, e sencajo se comprar ite, valch un di bie lurieres fac a man con gran cura da le femene del grop. L encas desche zenza vegn destinà a projec de solidarietà. L é dal 1981 che chest grop se dasc ju con sacotante azion de didament, tant te Fascia che foradecà. L é a la leta toae, gramiai, tasce de teila, peze da siar ju, decorazion per la ciasa e amò de auter, ogec realisé a pont a crousc, recam svizer, acherle, maia e c.i. che se pel se proveder per far n don o per recort da se portar a ciasa. Chest istà l é pervedù ence n auter apuntament per l picol marcià de benefizenza dai 10 ai 13 de setember, semper col medemo orarie. Ve speton de n muie!

»Vivanda« a La Pli
Le festival Badiamusica inviëia en sabeda ai 12 d’agost dales 21:00 tla ostaria Sotrú a La Pli, por le conzert »Vivanda« cun le trio »Cordes y Butons«
La vita é n bal. Datrai caotica y turbolënta, datrai pazifica y calma: vigni momënt á so ritm. Le trio »Cordes y Butons«, metü adöm da Reinhilde Gamper (zitra y usc), Tamara Gamper (vidora y usc) y David Moroder (acordeon y usc) á trasformé te musiga le füch dl plajëi por la vita: »Vivanda«. La parora vëgn dal latin y ó dí »vita«. Composiziuns originales y aranjamënc delicac se completëia un cun l’ater y mostra sö che l’essënza dla vita ne pó nia gní descrita ma cun öna na parora. Cun sües usc y sü stromënc alpins nes trasportëia i trëi musizisć te n ambiënt sonor sperimental cun n program ampl. Ai á cherié n univers sonur musical particolar che se avijinëia al raiun dles Alpes, al’Irlanda, ala Ruscia, ala Polonia, ai Paisc dl Nord, conscidran ince sü percursc musicai personai.
Por le conzert vëgnel ince pité n sorvisc de shuttle da Al Plan demez.

»Doubt and faith«–dübe y fede
Le festival Badiamusica vá inant en mercui ai 21 d’agost dales 21:15 te dlijia da La Ila, cun l’ensemble »La douceur et l’esprit«
Protagonisć dl conzert a La Ila é Andrea Oberparleiter (usc), Veronika Egger (vidora y viola da gamba), Nadia Prousch (fabló) y Marianna Bisacchi (cembalo). »Dübe y fede« é le titul dl conzert, che á da fá cun Tomesc, le desfidënt–la figöra de apostul te chëra che tröc pó se identifiché: al é plü scëmpl da crëie sce an á na proa. Sciöche Tomesc che mëss pié ite cun la man les ferides de Gejú por crëie ala ressoreziun. Tröpes dlijies tl monn é dedicades a S. Tomesc, danter chëstes ince öna dles döes dlijies prinzipales a Leipzig. Te chësta dlijia é la inciaria de cantor liada tra­dizionalmënter ala direziun dl »Thomanerchor«, che é dër conesciü y á n gran prestisc. J. S. Bach á surantut chësc rode por 27 agn. Operes de deplü cantors dla »Thomaskirche« de Leipzig y de mëmbri dl cor costituësc la strotöra musicala dl program, olache al vëgn integré les sis meditaziuns sön la figöra dl apostul Tomesc de Andrea Oberparleiter.

Mostra: Nexus Paradise
La Lia Tublà da Nives nvieia ala giaurida dla mostra »NEXUS PARADISE«, na mostra persunela dl artist da Laion Peter Senoner, n vënderdi ai 11 de agost dala 20:00
Ve nvion de cuer a zapé ite te n mond ulache sënies tleres y scultura inuvativa se anconta te n cunliamënt danter l rëni dla tiera y dl ciel. Te na fujion faszinënta de culëur, forma y emuzion, nes porta »NEXUS PARADISE« te n viac de trasfurmazion, nes giaurian la portes dl’ imaginazion. L nvit ai:ala vijitadëures ie chël de se lascé ite te chësc univers.
La mostra ie davierta uni di - ora che de lunesc - dala 16:00 ala 19:00; merdi, mierculdi y vënderdi nce dala 20:00 ala 22:00.

Cunzert dl’Orchestra Sonoton Gherdëina
L’Orchestra Sonoton Gherdëina nvieia de cuer al cunzert da d’instà n sada ai 12 de agost dala 20:30 y n dumënia ai 13 de agost dala 17:00, for sun Plaza de Chemun te Sëlva
Ntan l cunzert, sot ala direzion mujighela de Alex Designori, puderan scuté su l’opres “L’Arlésienne Suite No.1” de G. Bizet y “Bilder einer Ausstellung” de M. Mussorgsky/M. Ravel. Chertes de ntreda ie da giapé pra la cassa da sëira dala 19:30 inant (de sada) y dala 16:00 inant (de dumënia). N possa nce apusté danora la chertes tl ufize dla Lia dl Turism de Sëlva, cherdan su l numer de telefonn 0471777900. L’Orchestra Sonoton Gherdëina se ncunforta sun Vosc unì!

Festa dla lintiernes a Santa Cristina
N juebia ai 17 de agost dala 20:30 tl zënter Iman
N ucajion dla festa dla lintiernes uniràl pità n program de aurela curta cun l’afa Bobby y na defileda tres l luech de Santa Cristina. Per duc i mutons y la mutans saràl anjinieda na lintierna, coche nce crafons y zeche da bever.Ve aspiton n juebia ai 17 de agost da mesa la 9 da sëira tl zënter Iman.

Mostra: »L scultëur« de Hubert Kostner
N vënderdi ai 18 de agost saràl la giaurida dla mostra dl scultëur Hubert Kostner, dala set da sëira tl Circolo-Lia Mostra d’Ert
Tla lingia de scultures »Polychromos« se dà l artist Hubert Kostner de Ciastel ju cun l ert dl ziplé y cun si nterpretazion cuntempurana. Tl 2019 à Hubert Kostner scumencià a lauré cun figures de lën realisedes a mascin te Gherdëina, che ël abinova tla butëiga dl pere a Ciastel. A sogec defrënc, coche l vardian dla nuet, la figura dl paiazo, n valgun sanc, ti vëniel tëut demez si spersa y i vën planei ju te na forma cun ëures y ciantons. L ex prudot de massa devënta nsci na scultura unica y nueva.
La mostra ie da udëi tl self dla mostres dl Circolo dai 18 de agost nchin ai 3 de setëmber y ie davierta uni di dala 16:00 nchin la 19:00 y de sada y dumënia nce danmesdì dala 10:00 nchin la 12:00.

Curs de acuarel sun Resciesa
L curs cun Ottavia Demetz va da lunesc ai 28 de agost nchin vënderdi ai 1. de setëmber
Ottavia Demetz mët a jì n curs de acuarel sun Resciesa. N se anconta pra la fermeda a val dla ferata dala 9 daduman y l curs dura nchin la 5 domesdì. L custimënt ie de 350€, per n curs de ot ëura al di y cin’ dis: da lunesc nchin vënderdi, dai 28 de agost nchin ai 1. de setëmber.
Per nfurmazions plu avisa y iscrizions, cherdé su Ottavia Demetz al 333 9984830.

»Muss« en mostra
Tl Istitut Ladin a San Martin vëgnel daurí ai 25 d’agost na mostra de Guido Anton Muss. Ara sará da odëi n mëis alalungia
Le Museum Ladin inviëia, adöm al Istitut Ladin Micurá de Rü, ala daurida dla mostra »operes – Werke – opere« dl artist Guido Anton Muss. L’apuntamënt é por en vëndres ai 25 d’agost dales 18:00, tl salf dl Istitut Ladin a San Martin de Tor. Guido Anton Muss, figöra zentrala sön la scena artistica sudtiroleja dla secunda pert dl XX secul, é n artist che é sté bun da mëte adöm les animes desvalies – linguistiches, culturales y artistiches – dl raiun provinzial. Tla mostra, che sará daverta cina ai 24 de setëmber, él da odëi na seleziun de operes fora de coleziuns dla Provinzia che rapresentëia te na variaziun zënza fin tematiches che ti stô a cör, dala figöra feminina ala mitologia al rëgn di tiers.