La Usc di Ladins

Gara dla roda »Crono Fanes«
En sabeda ai 9 de setëmber él indô la gara cun roda da munt o E-Bike, da Pederü cina sön Fanes
La gara mët man dales 11:00, cun start dlungia la ütia Pederü. Concorëntes y concorënc pëia ia un al menüt. Al sará categories desvalies (pro la roda da munt do eté, pro la e-bike do pëis). Informaziuns plü menüdes y iscriziuns danfora sön www.eventsdolomites.org o al 327 3698176. L’iscriziun danfora costa 20,00€, da paié ite söl post. Chi che se scrí ite al start paia 22,00€. Lapró él ince na pasta tla Ücia Lavarella o Ücia de Fanes. Le numer de partezipanc é limité a 150 y por che la gara vëgnes fata mëssel ester almanco 30 iscric danfora. Cun l’iscriziun vëgnel azeté che l’organisadú ne surantol degüna responsabilité por ci che podess sozede dan, tratan y do la manifestaziun. Iscriziuns ma cun majera eté.

Plajëis y duciaries
Sön plaza de dlijia a Calfosch podarán ciarcé ai 29 d’agost de vigni sort de spezialités gastronomiches
Le mertesc ai 29 de agost vëgnel metü a jí dales 17:00 inant la mani­festaziun »Plajëis y duciaries«, sön plaza de dlijia a Calfosch. Por l’ocajiun sarál de plü eserzizi y uniuns dl paisc che arjigna ca spezialités tradizionales y patüc duc sciöche panicia, tutres y fortaies mo ince strudl, bales duces y de plü sorts de turtes. La manife­staziun, dedicada a düc i golusc che aprijëia le duc y le saré, vëgn acompagnada dal intratignimënt musical di grups »TriOlé« y »Aurela Cörta«. Ince por i plü pici vëgnel organisé de vigni sort de deverti­mënt, en colaboraziun cun l’Arte­janat Val Badia.

Sabina Willeit & Lignum Quintett
Chisc é i protagonisć dl conzert de Badiamusica dal titul »Un voyage dans l’opéra«, en sabeda ai 26 d’agost dales 20:30, te salf dles manifestaziuns a San Ciascian
Sön le iade tres la opera nes condüj a San Cia­scian Sabina Willeit (mezzosopran), Monika Federspieler (fabló traversal), Sonja Busellato (oboa), Werner Mayr (clarinet), Egon Lard­schneider (corn) y Igor Delaiti (fagot).
L’ensemble portará dant operes de Wolfgang Amadeus Mozart, Gioacchino Rossini, Georges Bizet, Giuseppe Verdi, Amilcare Ponchielli, Giacomo Puccini, Alfredo Catalani.

»Trio

• 
•  

View the embedded image gallery online at:
https://www.lausc.it/manifestazions-y-evenc/24687-manifestazions-atuales-speziales#sigProIdf1b03fe0f9

Arioso« a Badia
Le Festival Badiamusica 2023 vá a piz en mertesc ai 29 d’agost dales 20:30 tla Ciasa Runcher a Badia, cun n conzert dl »Trio Arioso«
Le conzert che stlüj ia le Festival Badia­musica de chësc ann vëgn a s’al dé ai 29 d’agost a Badia, olache al sará da aldí sön pala­dina le »Trio Arioso«, formé da Sabine Ranigler, Roberto Gander y Giulio Gar­bin. Düc i trëi musizisć á fat süa for­ma­ziun musicala tl con­ser­vatore »Claudio Monte­­­­verdi« y s’á spo spezialisé inant ince foradecá. Ai á fat esperiën­zes sön paladines nazionales y suraconfin; Gander y Garbin á tut pert y ince dava­gné pro concursc de livel nazional y internazional.

»Poesies y rimes« de Pio Baldissera
La Ciasa de Palsa Ojöp Frëinademetz APSP y l’Istitut Ladin Micurá de Rü inviëia ala presentaziun dl liber »Poesies y rimes« de maester Pio Baldissera, ai 27 d’agost dales 16:00, tl bar dla Ciasa de Palsa
Maester Pio Baldissera é nasciü ai 8 de ma dl 1929 a La Val. Do la scora elementara él sté dui agn tl Vinzentinum a Porsenú y spo ál frecuenté l’Istituto Magistrale, la scora da maester taliana, a Balsan. Tl 1957 él gnü a sté a San Martin de Tor, olach’al á insigné por 30 agn tla scora elementara dl paisc. 22 agn alalungia él ince sté presidënt dla Ciasa de Palsa »Ojöp Frëinademetz«. Maester Pio á scrit poesies, mo dantadöt rimes por ocajiuns desvalies; al á scrit y traslaté libri por mituns, componü de pici teatri por la scora, metü jö tl ladin de vigni sort de tesć y colaboré pro deplü publicaziuns ladines. Danter i auturs ladins vëgnel conscidré n »classich«, un che á dé dër tröp por la promoziun y la valorisaziun dl lingaz dla uma.

Mostra de Barbara Tavella
La Galaria Doris Ghetta nvieia de cuer ala mostra persunela dl’artista da La Val Barbara Tevella dal titul »Ein Flügelschlag entpuppt meine Körper«
La giaurida sarà n duman, sada, ai 26 de agost dala 18:00 nchin la 20:00 tla Galaria Doris Ghetta ora Puntives, pra chëla che l’artista sarà nce prejënta. Tres si chedri stimuléiela dui cin’ i sënsc.
Cun l titul gëura Barbara Tavela portes nueves per na maniera de liejer si lëures. Si chedri zënza telé y depënc te na maniera drët fina, ie partii ora liedies tla sala dla mostra y nes nvieia a zapé ite te n raport cun d’ëi.
Per ntënder l titul, nes porta l’artista plu daujin a si pruzes criatif. L bater dl’eles ie la mesura dl tëmp ntan chël che na larva se trasfurmea te n pavël. Nce zënza depënjer pavëi, porta chësta assoziazion a na fundamënta nueva de nterpretazion de si chedri: chël che se ascuend do d’ëi ne ie nia chël che se ascuend a nosta vista, ma chël che i lëures uel nes mustré da śën inant.

Val Sinergia Festival
N evënt che liëia adöm yoga, meditaziun, movimënt y sanité – dal 31 de agost ai 3 de setëmber a Al Plan
Tratan i 4 dis án la poscibilité da tó pert a de plü workshops, sesciuns de yoga, meditaziuns, conzerc y tröp d’ater. L’obietif prinzipal é da mostré tecniches y pratiches por mioré la sanité y descurí ci che bëgnsté ó dí. Deache vignun de nos se mirita sanité, contentënza y lidëza.
Cun la cherta d’entrada pón tó pert a n program rich y desvalí: de plü sesciuns de yoga y stii desfarënc; laborators de percusciuns y bal estatich cun Max Castlunger y Marylou; bagns dlaciá; qi gong; zerimonia dl cacao y cërtl dl cianté; escurjiuns desvalies; laboratore de calisthenics; ceramica cun Irina Tavella; ti ciaré ales stëres cun Julian Rigo; y tröp d’ater.
Al Val Sinergia Kids y al conzert che vëgn tigní la sabeda sëra pón tó pert zënza cherta d’entrada (les donaziuns volontares jará a fin de bëgn). Döt le program y i orars pón ciafé sön www.yog-amiga.com/val-sinergia-festival .