La Usc di Ladins

Open day per operatores turistics al Museo e a la Cèsa de Papa Luciani
La Fondazion Papa Luciani endreza ai 8 de mé da doman n Open day ai lesc culturèi leé al Beat Jan Paul I e out ai operatores turistics
L program perveit la vijita vidèda al Museo Albino Luciani e a la cèsa olache l Papa Jan Paul I é nasciù, a Canale d’Agordo; light lunch te la storica Bireria Costa e trasferta a la gejia monumentala de Sèn Simon a Vallada Agordina.
Per l secondo an chisc lesc i fèsc pèrt del zir­cuit de la Trentino Guest Card che sporc na entrèda con n gran rebas ai vijitadores di Com­prenjories vejins. Na ocajion per descorir la perferida culturèla de la Fondazion che, tel an del Giubileo, l’à enjignà n volantin informatif dedicà a percorsc per singoi e gropes ai santuaries e lesc tel Trentin e tel Sudtirol che Albino Luciani aea a cher. Se pel i troèr sul sit www.musal.it
Info & prenotazions: Tel. 0437 1948001; E-mail: info@fondazionepapaluciani.com

Musical »N de a La Spona«
En mertesc ai 22 de aurí dales 19:30, tl salf manifestaziuns a La Val
N de a La Spona é n de particolar, cun regoles, laur y orars che mëss ester, mo ince cun riüdes, ciacolades y jüc adöm. Chësc oress i assistis y les assistides de »La Spona« ti presenté al monn intier, implí cun cianties.
Marion Palfrader s’á tut le tëmp y á lauré fora adöm cun ëi chësta manifestaziun y düc ne á nia spa­ragné sforc, tëmp y usc por arijigné val’ dër de plajor, che vëgn mostré en mertesc ai 22 de aurí dales 19:30 a La Val.
I esson dër ion sce i Ves tolesses le tëmp da gní a se ciaré pro!

Corvara: Marcé dl patüc fat a man
Creativité, savëi y fantasia é trëi parores che an pó adoré por definí en cört le »Marcé dl patüc fat a man – ediziun da Pasca«, che gnará a s’al dé ai 13 d’aurí a Corvara
La Uniun dles Ëres da Corvara mët a jí en do­mënia ai 13 de aurí dales 10:00 ales 17:00 le »Mar­cé dl patüc fat a man – ediziun da Pasca«, tl salf dles manifestaziuns da Corvara. Al gnará metü fora patüc fat a man da pert de incër 30 espo­situries y esposidus.
Na pert de ci che vëgn trat ite i jará al »Wünsche­wagen« dla Crusc Blancia – che ti ejaudësc i »ultimi dejiders« a porsones che s’arjigna da morí.

»Ciüriachecena 2.0«
Chësc é le titul dl musical che la scora elementara d’Al Plan presentëia ai 15 y 16 d’aurí
Tla scora elementara d’Al Plan él en chësc ann gnü desfiré n proiet particolar. Deboriada cun Barbara Rottensteiner á dötes les scolares y i scolars imparé ite »Ciüriachecena 2.0«, n musical te cater lingac, olache al gnará presenté y cianté la storia tan conesciüda di fredesc Grimm, tla verjiun originala y te chëra ambientada tl dagní. Chi che é coriusc da savëi co che ciüria cöcena ciara fora, te ci sort de bosch che ara röia y ci lus che ara incunta, é bel inviá ales rapre­sentaziuns, che sará en mertesc ai 15 d’aurí dales 10:00 y dales 15:00, sciöche ince en mercui ai 16 d’aurí dales 10:30. L’entrada é daverta a düc y debann. Deache al é danmisdé ince cotan de scores che vëgn a ti ciaré, i vëgnel aconsié ai geniturs y adulc da gní ala presentaziun domisdé. Scolares y scolars se conforta da ves saludé.

Scola Mesana nueva GAIA: Sëires de nfurmazion
N merdi ai 15 de auril y n lunësc

• 
•  

View the embedded image gallery online at:
https://www.lausc.it/manifestazions-y-evenc/29296-manifestazions-atuales-speziales#sigProId8dbc8e9810

ai 19 de mei dala 20.00 uniràl prejentà a Puntives l cunzet dla scola mesana aldò de Maria Montessori
D’autonn puderàn crì ora de jì te na scola me­sana nueva, la prima de chësta sort te Sudtirol. L sarà na scola de vita tla cu­me­nanza, aldò dl cunzet drët revoluzioner per jëuni »The Erdkinder«.
Per chi che à fat na ele­mentera Montessori ie chësta na bela ucajion per pudëi jì inant cun chësta sort de nsëniamënt. L’iscrizions che saà ala fin de mei ie daviertes a duc chëi che fajerà d’autonn la 1a y 2a tlas, i posć ie limitei. De ciun ambient à pa i jëuni debujën per mparé y se svilupé? Tla sënta de scolina y scola recunesciuda a Puntives pòssen unì a scuté su per se fé na idea.

Lauratuere n con’ dla veles cumeneles
Tl local di jëuni SAUT vëniel metù a jì ai 17 de auril, dala 17:30, n workshop per i jëuni dai 16 ani insù che ne n’à mo nia l dërt de lité
N ucajion dla veles cumeneles ai 4 de mei vëniel metù a jì te na cunlaurazion danter la Nëus Jëuni Gherdëina, l Chemun de Urtijëi y l Südtiroler Jugendring n’azion tlameda »Schatten­wahl«, na sort de vela ulache i jëuni che ne n’à mo nia l dërt de lité possa dì la sia. L sarà na ucajion per njenië i jëuni y ti spieghé coche n chemun y la veles de che­mun fun­ziunea. Deberieda cun i referënc dl Südtiroler Jugen­dring iesi nviei a ru­jené de si idées y prupostes y dl daunì de Urtijëi.
N puderà nce rujené cun vel’ candidat dla doi listes che candidea chëst’ iede y ti purté dant cie che ti sta a cuer. Duc i jëuni nteressei ie nviei de cuer.