La Usc di Ladins

Ai 21 de lugio à n’am­­bu­lanza menà adalerch na pa­zienta che ova abù na reazion alergica a n pic de na bespia. La duturëssa ti à fat la prima cures y la ie pona furneda inant cun l joler nchin tl spedel de Persenon.

Ai 22 de lugio ie na muta unida morsa da na vipra sun Secëda - do la prima cures ie l joler julà limpea tl spedel de Persenon. Ntan l jol de reviers tla sënta a Puntives à la zentrela mandà l joler sëura l parëi nord de Sas Rigais, ajache l fova unì ju sasc. Do che n à abinà la luegia y udù che l ne fova deguna persones n pricul àn inò dat ëuta.
Domesdì iel stat mo n ntervënt sa Sautaria, ulache n’ëila americana fova tumeda cun si roda da mont. Do la cures l’àn ciarieda tl joler y meneda tl spedel de Bulsan.
Plu tert à la Crëusc Blancia menà adalerch n pazient che i ova ciarià a S. Cristina. L se tratova de na emer­­gënza sanitera. L ël dla Talia ie unì ciarià tl joler y menà a Persenon te spedel.
L ultim ntervënt dl di - nce chësc per n’emergënza sanitera - ie stat sun Mont de Sëuc. L ël de naziunalità taliana ie unì menà cun l joler tl spedel de Persenon.

De plu tla edizion stampeda de La Usc di Ladins o sun l e-paper a paiament www.lausc.it/e-paper