La Usc di Ladins

I jeghes olimpics de Losanna ge à portà a la Tèlia te l’ultima giornèda na bela medaa de bron de gra al resultat te la stafeta nordica mescedèda, la neva disciplina che met adum atlec de ic e de eles de saut, combinèda e paslonch.

Te la squadra de 6 atlec 3 di campions i é de noscia valèdes: Jessica Malsiner e Mattia Galiani de Gherdena e Annika Sieff del Ski College de Fascia.

I doi atlec de Gherdena se à fat onor tel saut coi schi, Annika Sieff adum con Stefano Radovan à defenù l resultat te la combinèda e en ultima Silvia Campione e Elia Barp à fat amò l’ultim struf passan via la Franzia e ruan sul podie tedò da la squadres de la Norvegia e de l’Austria.

N resultat de gran sodesfazion, che smaora la sodesfazion di atlec taliegn e ladins. Da recordèr che Annika Sieff à concostà ence n bel 6° piazament te la Gundersen e l 9° tel Team Mixed, e amò per i atlec del Ski College l’é Giada Tomaselli 11^ tel saut, Jacopo Bortolas 18° te la Gundersen e Jannes Debertol 22° tel schi cross. En ultima Simone Mastrobattista da Moena de le Fiamme Gialle tel paslonch à arjont n bel 18° post tel cross, la ge é jita enveze manco ben te la 10 km e te la sprint, olache l’é crodà e l se à entardivà ruan respetivamenter al 35° e al 53° post.  (LG)