La Usc di Ladins

»Rué sunsom reston leé per passèr fora la cresta malsegura che con sie crescer e calèr la ne porta al Pas da le Cirele e te pech temp, coran sui giarons ruon te Fuciada, lech pien de turisć de ogne sort. Doi manieres desvalives de viver i monts a pec pasc un da l’auter«. Chestes la paroles de Giorgia Felicetti, l’atleta de la Nazionèla talièna de schi alpinism, che la conta de la repetizion de la Via de la Fessura Gialla su la Tor Enrica del Jigolé sun Marmolèda. Na via da rampinèr, no trop cognosciuda, che l’atleta de Ciampedel à volù fèr en cobia con Federico Dell’Antone, auter fort atlet dolomitan clasc ‘94 per fèr festa per sie cedean.
L’era apontin ai 28 de jugn l cedean de l’atlet de Soteguda e, per festejèr chesta giornèda spezièla, el e Giorgia Felicetti i se à pissà de »se fèr doi pasc« ensema.
»Aane tel cef de fèr vèlch de particolèr – à dit la fascèna - per chesta giornèda, vardan de se adatèr al meteo mingol mat de chest temp. L’an passà siane jic sun Cresta Kuffner al Mont Maudit sul Mont Blanc, pontan via da la val fin sunsom e ju de outa, l’era stat na bela e longia aventura. Chest an enveze aon cernù de stèr chiò en zona su nesc monts, la Dolomites, che tant amon«.

De più su La Usc 28 stampèda ai 17 de messèl  (Daniele Verra)