La Usc di Ladins

La 7^ edizion de la garejèda skialp sul confin anter Trentin e Lombardia l’é stat n suzess, con 160 cobies da 12 desvaliva nazions che à tout pèrt enceben l Covid e la dificoltèdes de viajèr. 

La cobia venjidora de la proa che en sabeda ai 10 de oril à serà la sajon internazionèla del skialp su la longia distanzes l’é stat Bon Mardion-Herrmann, con i taliegn Nicolini-Prandi al 4° post.

Legreza talièna enveze anter la eles, con la cobia de Giulia, Murada e Compagnoni, che à portà i colores nazionèi al prum post. 

A un soul pas dal podie la fascèna Giorgia Felicetti, che à coret dessema a la polaca Anna Tybor. Dò la bela prestazion l’atleta ladina la se à dit dassen contenta per l’ejit de la proa e de duta la sajon.

A raprejentèr i colores de Fascia no demò Felicetti, ma ence doi cobies anter i omegn. Al 39° post assolut se à defat logà i Bel e Bon, team ladin formà da Cosma Verra de Dèlba, che ruèa da la 24h challenge, e Mirko Micheluzzi de Penìa. Al 61° l Team Vernel, con Cesare Sottsass de Penìa e Andrea Lollo da Pian.

De più su La Usc spampèda de vender ai 16 de oril.    (Daniele Verra)