Diego, su la rodènes de Quartararo

Data

30 de mei 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L joenet da Sèn Jan é ruà sul podie de la Copa Tèlia Junior de moto sun strèda a Adria.
L’à compì 13 egn l prum de jené, Diego Brunel, e n’é jà passà 9 da canche chest joenet fascian, da Poza con mingol de reijes a Soraga e a Cianacei, l’à tacà a jir a ciaval de na moto.
L’aea 4 egn, con sia familia l’era al mèr a Cattolica e i l’à portà su la pista per minimoto, una de cheles olache scomenza i campions.
L père Claudio, da semper pascionà de moto, l’é amò jit en pista ma demò da gran, a livel amatorièl, ajache n’outa segur chiò da nos n bez no podea nience pissèr che a cèsa i ge compre na moto e i lo mene stroz a fèr alenamenc e gares. Canche l’à vedù che Diego à rità sia medema gaissa per chest mond, l’à venù sia moto e l’à tacà a compagnèr l fi sul troi de l’agonism.

»Dant ge é comprà la moto da cross - l disc - perché me saea più sorì chiò entorn, dapò canche l’à abù 8 egn ge é fat proar chela da strada. Ge à sapù bel e ades da 5 egn l va sui zircuic aposta a se alenar. L più vejin l’é jun Busan, dapò n’é un ence a Ala. Ogne tant jon ence con la moto da cross che de zircuic da cross n’é mingol de più.«
Diego l’à tacà a fèr garejèdes de 8 egn con na moto automatica e l’an dò l’é ruà 4° tel campionat. Dò l’é passà de categoria e con la 110 a marces l’é ruà ti prumes 10. Dapò l’é passà a la 160 e te la finèla a Franciacorta l’à mencià per pech l podie, ruan al 4° post.
Chest an con la Ovale GP2 da 12 pollici Diego l’à tacà te la Copa Tèlia categoria Junior e l scomenz l’é stat dassen da marevea, ajache te la pruma garejèda stata de mé a Adria l’é ruà sobito sul podie se vadagnan l secondo post. Ades l’é en program na garejèda ogne meis, ai 6 de jugn la sarà a Ortona, te l’Abruzzo e en ultima vegnarà fat la media di ponts e chest scomenz fèsc sperèr dassen ben.

De più sun Diego e sia pascion per la moto da strèda su La Usc stampèda de en vender ai 28 de mé del 2021.  (Lucia Gross)