La Usc di Ladins

Va inant zenza pausses la sajon de la rodes, che jà da n trat les é en pista te desvaliva garejèdes. Semper più ativa con l passèr de la setemènes ence la sozietà sportiva Fascia Bike Racing Team che anter enduro, gara longes e ativitèdes per bec la se dèsc ju trop con si atlec.

Do la pruma prestazions sajonèles con Nicholas Boscolo e Fabio Corradini te la pruma tapa del Zircuit Trivenet de enduro a Gorizia e de Valerio Bacchiocchi te la Granfondo de Bardolino, che jà ve aane contà su La Usc, i atlec de la sozietà fascèna se à dat ju te autra competizions.

Na disciplina che veit semper più empegné i atlec Fascia Bike, e che da chest an la vegnarà metuda dant ence ai bec ti corsc da d istà, l é l enduro. 
La bela prestazions te la disciplines de enduro e downhill à portà entusiasm per l Fascia Bike, che sessaben l é semper atif su la strèdes da mont coi atlec de la garejèdes longes de mountainbike. 

Ma la maor neva l é che con l Fascia Bike Racing Team ades cor ence i più picoi. En lunesc prum de mé se à coret l 4° Trofeo Sudtirolpost, garejèda di joegn te la disciplina Short Track – XCC. La proa é stata metuda a jir a Laives, olache l Fascia Bike à portà al start i frèdes Nicole e Samuele Ballis. 

De più su la Usc stampèda de vender ai 19 de mé.  (Daniele Verra)