La Usc di Ladins

Na bela medaa de bron nazionèla é ruèda te Fascia de gra al joen biker de Poza Francesco Pezzei, 18 egn, del Trial Bike Dolomites de Sèn Jan. 

Enstadì con sia squadra l é jit enscin te la provinzia de Caserta, a Alvignano Caiazzo olache l à confermà la valuta che l aea jà metù al luster te la competizions da dant, se vadagnan l terzo post te la categoria juniores.

La garejèda di campionac taliegn trials junior, n muie scombatuda, se à dejout sun 5 zones con 6 passajes vigniuna e Franz à desmostrà sia capazitèdes a livel tecnich, metan adum abilità tatica, conzentrazion e equilibrie, ruan sul podie tedò da Cristian Bursi da Modena e Michel Negrini da la Val d’Aosta.  

Francesco Pezzei se aea jà vadagnà la terza posizion ai 30 de oril te la pruma tapa de Copa Tèlia a Porto d’Ascoli e ence a Ardesio, te la provinzia de Bergamo.

Te la garejèda l é stat etres doi joegn atlec de la sozietà che se à piazà giusta ju dal podie, duc doi al 4° post: Victor Rizzoli da Moena, ence el de 18 egn, e Alessandro Pezzei de 16 egn, fra mender de Francesco. I bikers fascegn se à fat onor ence te la garejèdes de Copa Tèlia a Lazzate e a Rosignano Solvay, mencian per pech l podie.

Chisc bon ejic ge dèsc sodesfazion a nesc joegn e i conferma l bon lurier envià via acà trei egn dal president del Trial Bike Dolomites Lorenzo Pezzei Mongo, père de Francesco e Alessandro, che l ge stèsc do a n grop de na chindejina de bec e joegn da Fascia e Fiem tel ciamp de arcedament che l é stat endrezà jun Pucia. Do la bona esperienza fata per la pruma outa de setember del 2022, l Trial Bike Dolomites l ge à fat vadagnèr a Sèn Jan n post stabol tel calandèr de la Federazion talièna de rodes e ence chest an la sozietà fascèna endrezarà n apuntament: l’ultima tapa del zircuit de Copa Tèlia sarà defat a Sèn Jan ai 17 de setember.  (LG)