La Usc di Ladins

N de olache le bilanz é plü co positif. Chësc é ci che an pó dí dla domënia passada ai 14 de jená, olache le zënter de paslunch Alta Badia i á fat da paladina a na gara de biathlon jonila, varënta por le Trofé "Hubert Leitgeb". Por le pröm iade án podü tigní la gara tl areal cun la strotöra nöia, che pîta deplü sauridanzes ince por l’organisaziun. Chësta é stada tles mans dl’assoziaziun Alta Badia Nordic y i ladins é rová bëgn 9 iadi sön podest – trëi iadi sön le scalin plü alt.
I metun man cun la categoria di aliefs U15 (7,5 km), olache Luca Aricò dl Alta Badia Nordic á davagné cun le tëmp de 27'05.7. Terzo post por so compagn de scuadra Giovanni Gnesotto, che á stlüt jö cun 27'25.4. La secunda devënta badiota é garatada pro les alieves dla U15 (6 km), olache Elsa Canins dl Alta Badia Nordic á podü trá le salt söl scalin plü alt, stlujon jö cun 23'48.1. Medaia de brom á fat süa compagna Katia Pallua cun 25'23.5. La terza devënta röia spo ia en Gherdëna, olache Adam Oberhauser á arjunt le pröm post tla categoria U11 di mituns (3 km), cun le tëmp de 12'14.4. A chisc resultac s’injunta ciamó i podesć tla U11 dles mitans (3 km), olache les gherdënes Katharina Senoner y Aylin Pitscheider á arjunt respetivamënter la medaia d’arjënt y chëra de brom, la pröma cun le tëmp de 14'38.5, l’atra cun 14'53.9. Dui podesć gherdënes él ince garaté tla U13 dles mitans (4 km), olache Lena Kostner é gnüda secunda cun 18'07.9, Lara Oberhauser terza cun 18'09.0.
Por ci che reverda la classifica dles scuadres, á i atlec da Antholz arjunt le pröm post, dan l’Alta Badia Nordic al 2. y le Gherdëina al terzo.  (pablo)