N’autra gran bela giornèda su La VolatA de Sèn Pelegrin per la seconda libera de Copa del Mond de eles. La campiona svizra Lara Gut-Behrami con na proa ezelenta, zenza nesciun fal, la é bona de se vadagnèr n auter prum post col temp 1’25’’53. Sobito tedò da ela per 32 centeisemes n’autra svizra Corinne Suter e sul terzo sciaier con 68 centeisemes de destach la todescia Kira Weidle. Lara Gut-Behrami seghita a concostèr ponc per venjer la copa del mond de spezialità che per endèna é amò te man de la talièna Sofia Goggia. Ramona Siebenhofer, che angern à concostà l secondo post, anché la é ruèda quarta. La é sutèda fora enveze la forta americhèna Breezy Johnson che la é sutèda te la rees ma per fortuna no la se à fat mèl.
Complimenc a la trentina Laura Pirovano che anché se à vadagnà l beliscim 5° post, a 79 centeisemes da Lara Gut-Behrami e demò 11 dal podie. La classifica moscia doi taliènes anter la mior diesc con Elena Curtoni al 10° post.
Complimenc ence a la ladina da Gherdena Nadia Delago classifichèda 13^, l’à miorà de trei posizions respet a angern. Vegn dò Federica Brignone 23^, Marta Bassino 24^, Francesca Marsaglia 25^, Roberta Melesi 30^. Fora da la miores trenta l’é l’autra ladina Teresa Runggaldier 38^ e Federica Sosio 46^.
A sostegnir la atletes al travert anché l’era na pìcola formazion de la Musega de Moena. Canche l’é ruà jù Marta Bassino la ge à sonà sù per ge fèr i augures ajache la schiadora anché la compesc 25 egn. Angern enveze l'era l Grop de la Mèscres de Cianacei che à viventà l'event.
Doman ultima garejèda su La VolatA, da les 11.00 l’é en program l SuperG. (mci)
La svizra fèsc l bis su La VolatA
Lara Gut-Behrami pruma te la seconda libera de Copa del Mond te Fascia. La trentina Laura Pirovano se classifica 5^.
Galaria retrac
View the embedded image gallery online at:
https://www.lausc.it/valedes-ladines/fascia/14978-la-svizra-fesc-l-bis-su-la-volata#sigProIdfcfa4efc82
https://www.lausc.it/valedes-ladines/fascia/14978-la-svizra-fesc-l-bis-su-la-volata#sigProIdfcfa4efc82