La Usc di Ladins

Con gran sodesfazion l Procurador con duc i aministradores del Comun General de Fascia e l Conseier ladin i à fat a saer che la Jonta de la Provinzia autonoma de Trent à tout la dezijion de orir endodanef l sit per la vazinazions te Fascia

La proponeta, portèda dant dal Comun General en cordanza coi ombolc con na letra ai referenc de la sanità trentina amò ai 26 de mèrz, dò la scontrèda del vender del Consei de la Sanità de Val, l’era chela de meter a la leta per fèr i vazins la senta aló da la palestra de la scoles mesènes de Sèn Jan.

Te n prum moment ampò chesta letra no l’à abù resposta en no la é stata touta sù e dò la comunicazion, ruèda ai 9 de oril, che coi 12 de chest meis i fascegn aessa cognù jir fin fora Ciavaleis per se fèr encalmèr, se à levà la protestes de la comunanza e di aministradores de val. Dò na seconda letra manèda sobito dal Procurador Detomas, che l’à abù ence l sostegn del conseier ladin Guglielmi, la Povinzia à azetà de scutèr la ousc de la comunanza de Fascia.

»L’unità de intendimenc desmostrèda te chesta ocajion – à comentà Detomas - la moscia dassen che se noscia val la stèsc adum l’à l met de se fèr entener e de arjonjer obietives emportanc.«

La Provinzia à dit de aer tacà a se endrezèr jà anché per endrezèr la senta, endèna aboncont chi che aea l’apuntament te chesta setemènes i é dò a vegnir contaté da l’APSS e avisé che i cogn jir forin Fiem, e somea che chest cogne jir inant fin a la fin del meis.

 (lg)