La Usc di Ladins

L Comun de Sèn Jan é rich de or brun, èga da solper e èga oligominerala. N melaur che ades pel vegnir valorisà e desfrutà coche carenea.

L Minister de la Sanità de Roma à recognosciù l’èga termala »Fontana Pucia« tel Comun de Sèn Jan per la balneo-fangoterapia tel tratament de la patologìes de l’aparat osteo-articolar e l’èga minerèla naturèla »Gran Fontane«, semper tel Comun de Sèn Jan, desche èga oligominerèla per meter te bòcia e la vener.

Doi recognoscimenc che la sozietà Fassa Terme à uzà fora con gran sodesfazion en sabeda ai 15 de mé en ocajion de la radunanza di sozi.

La carateristiches de la èghes da solper de Aloch é cognosciudes da egn, ma fosc pec sà che duta la zona de Aloch é rica de fontènes. La sozietà Fassa Terme à volù investir sun chest melaur e de gra a la colaborazion col geologh Armando Chini l’à descorì n’autra gran fontèna, autonoma da chela che vegn desfrutà ades da Terme Dolomia e en pèrt ence da Fassa Terme per sie stabiliment termal. Na fontèna de èga da solper 125 metres sot tera – ne à dit Claudio Merighi, secretar de la sozietà Fassa Terme con encèria su la èghes - olache vegn fora 6 litres de èga al secont con na gran prescion. Amò de dezember del 2015 la sozietà à envià via l percors de analisi con l’Università de Pavia e col CNR de Pisa, n percors lonch e complicà, ence per domanèr duta l’autorisazions per la durèr te stabiliment per la balneo-fangoterapia tel tratament di mèi ai osc e a la articolazions. De november del 2020 l’é ruà l parer favorevol del Consei Superior de Sanità e de dezember chel del Minister de la Sanità.   

L’auter gran vèrech inant l’é chel per l’èga da beiver. L’èga de le »Gran Fontane« é stat recognosciuda èga minerèla naturèla. »Ades vardaron de troèr la cordanza con l’ASUC de Vich – ne à dit amò Merighi – per meter jù i tubi e la portèr te n post per dapò la meter te bòcia. Se podessa ruèr a meter te bòcia 10 litres de èga al secont e aer na produzion de 500/600 mile bòces al dì.«

N valor enjontà per duta la comunanza che pel se miorèr de chisc doi traverc emportanc arjonc da la sozietà Fassa Terme.

De più su la radunanza de Fassa Terme su la Usc stampèda de en vender ai 21 de mé del 2021.  (Monica Cigolla)