La Usc di Ladins

Tel meis de firé de chest an l é vegnù fora n bando del MIUR tel chèder del PNRR per finanzièr frabicac per istituzions formatives per i più picoi, donca scolines o coe di picoi. Da egn l’aministrazion de Ciampedel aea tel cef de fèr fora l frabicat olache l era la veia »Cantinetta«, che l é apontin de proprietà del Comun, per ge dèr na destinazion utola a la comunanza e no la se à lascià sciampèr la ocajion, soraldut conscidran che chisc meisc che vegn aur na neva coa di picioi a Soraga, donca fossa de gran utol poder aer chest servije ence te la Val de sora e chel frabicat podea aer duta la carateristiche per chesta destinazion. 

L’aministrazion, col ombolt Ivo Bernard e l vizeombolt e assessor ai lurieres publics Alessandro Bernard, ge à dat sobito mandat al ofize tecnich de lurèr fora n projet per poder manèr ite la domana tel curt temp conzedù de n pèr de setemènes.

I tecnics de Comun, Susanna de Biasio e Erwin Lorenz, i à enjignà l projet preliminèr e enstadì, avisa ai 26 de otober, l é ruà la resposta ofizièla con la comunicazion de la bela neva: l projet, che dant era stat tout su »con resserva«, é stat azetà definitivamenter e sul PNRR pel vegnir finanzià la soma domanèda.

De più su La Usc stampèda de vender ai 11 de november.  (Lucia Gross)