La Usc di Ladins

Mencia oramai pec dis a la 50^ edizion de la Marcialonga. I sarà de passa 7 mile i atlec da 34 nazions che en domenia ai 29 de jené se endesfidarà sul percors de 70 chilometres che passa fora la valèdes de Fascia e Fiem. Mencia duc i atlec rusc che no tolarà pèrt a chesta edizion. La zerimonia de avertura sarà a Trent, en jebia ai 26 de jené, olache te piaza Duomo, dut intorn al festil de Nettuno e per n toch de via Belenzani vegnarà metù ju n tapé de neif lonch 200 metres. Duta la neif vegnarà fata te val e portèda fin a Trent con na dejina de camion. Chest à soscedà ence critiches per l aspet ecologich. 

En ocajion del cedean toron su La Usc, tel numer di 20 de jené e ti numeres che vegnarà do, publicon la gustegola testimonianza de Bepin Davarda da Cianacei, che à tout pèrt a la pruma edizion e a dutes cheles do, fin acà vèlch an.