La Usc di Ladins

Saee che cognee jir a me fèr doi ciacoles con Olinda jà da mingol de temp! Olinda Riz del Todesch, la più jona de 6 sores e n fra, Paul, la se recorda amò de la mèscres a Ciampedel fora per i egn Cincanta e del prum grop de Schuhplattler che l era stat metù su zacan. Recorc e fac massa fora de anter per no contèr sun noscia piates, e che pec aldidanché se recorda o, amò de manco, à vivù en pruma persona.

Anter n recort e l auter, con Olinda l é sutà fora ence l Bar Miriam che l era aprijià e cognosciù no demò a Ciampedel, ma ence ti etres paijes fascegn. I ruèa adertura da Moena su, la me conta Olinda. Te l’intervista ge aon lascià lèrga ence a de etres argomenc, desche per ejempie sia joentù e coche la é stata che l’à cognosciù sie om Mario Tabak: se aon lascià menèr dai recorc che man a man ciutèa fora da la memoria…

Podede ne contèr vèlch de voscia familia?
Olinda Riz Mie fra più veie l era Paul, clas 1926, e do duta l’autra sores, Anna, Miriam, Lina e la jomelines Rosina e Marianna. Mia mère l era Maria Davarda: i ge dijea ‘de Paul’, Paul fossa stat mie giaf. Mie père l era Federico Riz del Todesch. Mia sores e mie fra i é duc nasciui sa Salin, te cèsa del papà, inant de jir su per Duron. I stajea lo. Gé son enveze nasciuda olache do sion stac, semper a Ciampedel, ma te cèsa che ades stèsc mie nez Giuseppe, lo per jir sun gejia, olache defora l é na Madona. Son nasciuda ai 2 de dezember del ’37.


De più su La Usc stampèda de vender ai 17 de firé.  (Nicoletta Riz)