La Usc di Ladins

L gran vent e i temporai stac via per la metà de messal à endò uzà fora l problem de l’aga a Vich. Ai 20 de messal, aldò di controi fac su la rei de l’aga da beiver del Comun, l é vegnù fora l’ordenanza che a Tamion se cogn boir l’aga e do 15 dis chesta ordenanza no la é amò stata revocada, e l malcontent di sentadins de Tamion se fasc sentir. 

»Gio é ence na strutura turistica – ne à dit Stefano Weiss del Hotel Gran Mugon – e é abù ghesć che é stac mal debel per l’aga e n muie de autres, no demò chiò da me, i é se n jic. La jent de Tamion la é n muie enirada e la peissa che no sie stat fat dut chel che se podea far percheche chest no seghite a sozeder, perché sarà la terza o quarta outa ti ultimes 5 egn.«

»Prum de dut – ne à dit Florian – voi sotlinear che l’ordenanza la é demò sun Tamion. Te dut l rest del tegnir de Sèn Jan l’aga la é a post, se vegn n temporal pel esser che vae ite mingol de lim, percheche a Sèn Jan l é dute le fontane en superfizie, ma se pel la beiver. Dut istà, presciapech da le metà de jugn fin la metà de setember la vegn clorada per segureza. 
L problem sun Tamion l é stat percheche coi temporai, l vent e dut chel che l é stat se à crepà la fognatura di refuges Roda de Vael e Marino Pederiva, ma l Comun chest no l pel l perveder. Dal 2019 en ca, do che l era sozedù l gran problem, noi fajon sistematicamenter le analisi de l’aga e canche l é ruà i resultac e se à vedù che per la fontana publica de Tamion i era fora, aon fat sobito l’ordenanza che se cognea boir l’aga. Inant che revocar l’ordenanza, soraldut vedù che l é jent che scrif en Procura e daperdut, gio voi esser segur al cent per cent che no l é nesciun problem.«

De più su La Usc stampèda de vender ai 4 de aost.

 (Lucia Gross)