La Usc di Ladins

Cater confalons col sfon brun, bianch e vert é stac metui fora te sala del Consei del Comun de Sèn Jan per raprejentèr la istituzions che anchecondì à tout su l’aministrazion de la veia regoles de Vich, Poza e Pera.  

La scomenzadiva é peèda via da la dezijion del Comun de Sèn Jan, nasciù jai 6 egn, de se enjignèr l confalon e de ge jir do al stel che à caraterisà ence etres confalons te val, per vardèr de sotrissèr la partegnuda metan l blason del Comun sul sfon di 3 colores de la bandiera ladina e de dèr n segn de union e leam anter la aministrazions de val.

L blason del Comun de Sèn Jan era stat dessegnà da Alberto Detomas do che del 2017 i doi Comuns de Poza e Vich se à metù adum, aldò de la indicazions de contegnù simbolich metude ju da Cesare Bernard e de la regoles araldiches, e l moscia l ciampanil de la Pieif de Sèn Jan e la Torns del Vaiolet, la Veisc e trei steiles de or desche simboi de duc trei i paijes che fèsc pèrt del Comun. Te chesta ocajion l é stat realisà ence i confalons de la trei Frazions.

De più su La Usc stampèda de vender al prum de setember.

 (Lucia Gross)