La Usc di Ladins

I era de tropes i raprejentanc del Comun General de Fascia e de la sociazions de protezion zivila e del sozièl che en lunesc ai 11 de setember à tout su l envit del procurador del CGF Bepe Detomas per jir a saludèr e rengrazièr l tenent colonel Enzo Molinari, Comandant de la Compagnia di Carabinieres de Ciavaleis, che ai 28 de setember l jirà en penscion.

Molinari era ruà chiò da la Val d’Aosta del 2016 e ge à semper piajù i lesc da mont. Te chisc egn l é stat n referiment emportant per Fascia, semper desponibol te la situazions da vigni dì e te cheles più encompres. I raprejentanc di Carabinieres de la stazions de val, de la Polizia de Moena, di Studafech de la Federazion e del Distret, di Polins, del Socors, de la Crousc Checena e Biencia, de la Scola e de la Parochies de Fascia se à binà apede ai Conseieres de Procura te sala grana del Comun General, olache Molinari à palesà gran piajer ence con comozion per chest moment de salut. Al tenent colonel ge é stat sport desche segn concret de develpai n tulin de legn con su l stema del pèster depent, che l CGF à fat realisèr dai studenc de la Scola de Fascia desche sie omaje de raprejentanza. A Molinari duc i prejenc ge à sport ensema al develpai i miores augures per sie davegnir.  (LG)