La Usc di Ladins

60 egn del Grop Ladin da Moena e del boletin Nosha Jent: na longia strada su le pedie de chi che enceben le fadie, le struscie e i empedimenc à seghità a verjer e segnar, con empegn e spirit ladin. E coscita per festejar polito chest emportant cedean l diretif del Grop Ladin à endrezà n bel moment de festa en domenia ai 5 de november te sala de Consei de Comun de Moena.

La presidenta Angela Chiocchetti dantfora à recordà i pionieres che jai 60 egn à metù su l Grop Ladin, sezion de l’Union di Ladins de Fascia, e à pensà de tegnir adum col boletin Nosha Jent. »I lo à fat zenza enteresc personai – l’à dit - con puro e trasparent spirit de volontariat che vardava al Ben de la Comunanza, con l ideal de mantegnir cultura, lengaz e tradizion ma ence averc a la colaborazion con autre realtà e popui sorafora i confign de noscia picola val per la far crescer e miorar. Se aon otegnù recognoscimenc desche mendranza europeana, benefic e deric da Trent e da Roma l é stat de grazia a chi che à metù tanta pascion e fadie e per noi l é n doer defener chest nosc gran patrimonie e soraldut ge meter chela gaissa che i ne à lascià con l ejempie.« Sun duc l à recordà doi persone: Simonin Maza, stat anter i fondadores e più oute president, semper en pruma linia fin tinultima, n pont de referiment per chi joegn che da zeche ora à ciapà te man l Grop; e Silvia del Zenti, se n jita chisc dis passé, ejempie de vita e de amor per noscia cultura e lengaz.

Do i saluc l é stat l moment de far n varech tel passà col referat de la storica Maria Piccolin, stata presidenta del Grop Ladin dal 2001 al 2010 e l é stat recordà i presidenc di egn passé: Domenico Volcan Terla dal 1983 al 1992; Nadia Chiocchetti dal 1992 al 1998; Marianna Romanin dal ’98 al 2001; Maria Piccolin dal 2001 al 2010; Maura Chiocchetti dal 2010 al 2014 e da enlauta inant Angela Chiocchetti. Duc chenc à metù dant valch recort, le publicazion, le manifestazion per se far cognoscer e lear ensema le mendranze desche l Festenal, le sodesfazion per i resultac tel ciamp aministratif e legislatif, le fadie e le persone che ge à avert la strada che ades no é più anter de noi.

De più su La Usc de en vender ai 10 de november del 2023  (Monica Cigolla)