La Usc di Ladins

L é stat n confront percacent anter i studenc da ades e l ex student del Liceo artistich de Fascia Ismaele Soraperra, en vender ai 2 de firé te la sala esposizions de la scola. L’Union di Ladins de Fascia à cernù apontin chest lech per serèr su l projet »Fac«, che l é stat portà inant fora per dut l an 2023 ensema col joen artist fascian. N projet pissà do che l é stat serà su l lonch percors del Almanach coi dessegnes de Manuel Riz, dozent a la mesènes te la medema Scola de Fascia, per palesèr la volontà de la sociazion ladina de se averjer a l’èrt, vardan de valorisèr la proponetes del teritorie e de se averjer più che l é meso ai joegn.

Per l’ocajion Ismaele, col didament di studenc, à fat n bel alestiment, olache i 6 lurieres de èrt grafica realisé fora per l an, e compagné dai tesć ladins de la joena ex studenta de la Scola de Fascia Nicoletta Riz, é stac metui fora te trei verscions: cheles a stampa digitèla sun papier plastificà fates vigni doi meisc e dates fora a chi che à tout pèrt a la scontrèdes, e apede i poster su papier col plotter realisé da la sociazion per chesta ocajion e la serigrafies fates personalmenter a man da Ismaele. 

De più su La Usc stampèda de en vender ai 9 de firé.

 (Lucia Gross)