La Usc di Ladins

L becherle se magna amò nesc bosć enceben che l tempram fresch e da pievia de l’aisciuda passèda aesse mingol ferà sie dans. I dac porté dant dal diretor del Ofize Forestal de Ciavaleis Damiano Fedel e dal vizediretor Francesco Dallabrida te la sescion forestala del Comun de Sèn Jan en jebia ai 15 de firé moscia che l numer de chisc cheifres é smendrà via per l 2023 respet al 2022 e ence con la 32 tenetes sun dut l Distret n é stat ciapà de manco. 

Fèsc cruzièr l dat total del dan da becherle, da Vaia enscin ades: beleche 830.000 m3 de legnam danejà, de chisc 252.000 m3 del 2023, slarià fora sun 908 etares (del 2022 n era stat dombrà 392.000 m3 sun 1802 etares). »No l é sorì fèr previjions per l 2024 – à dit Fedel - percheche dut stèsc a coche sarà l tempram d’aisciuda, se sarà fresch l becherle stentarà a se slarièr fora, aboncont ades se pel veder che l pec cresc più fort e l é bon de ge fèr front. Ence chest an donca no vegnarà più fat gran assegnazions de legnam per presservèr l bosch san.«

De più su La Usc stampèda de en vender ai 23 de firé.  (Monica Cigolla)