Da egn oramai l Grop Miscionarie Freinademetz e Mato Grosso endreza tel temp de Careisema na cena pureta, na sera olache la comunanza vegn envièda a condivider n bast scempie, a pissèr sora a desvaliva situazions de meseria e de ingiustizia che l é tel mond, a cognoscer e sostegnir scomenzadives e esperienzes che proa a fèr vèlch per les smendrèr.
Chest an la proponeta del Grop miscionarie fascian se à leà a chela de Operazione Colomba, che da 10 egn tol ite anter si volontères ence na joena de noscia val.
Operazione Colomba l é l Corp noviolent de la Comunità Papa Giovanni XXII che se dèsc ju te desvalives lesc del mond olache l é situazions de conflit vardan de capir, condivider e fèr n tòch de strèda con la popolazion locala e proan a portèr n ejempie de pèsc, giustizia e soluzion pazifica.
La proponeta l é chela de na cena scempia, con na cercia de hummus e cous cous, ma soraldut n envit a vardèr con atenzion e cher avert a la situazion te lesc olache da massa temp vegn portà inant ingiustizia e soprafazion, a la persones che la vif sun sia pel vigni dì e a cognoscer l’atività di volontères che da egn ge stèsc vejin. En sabeda ai 2 de mèrz da les 7 da sera te oratorie de Poza se podarà donca sentir rejonèr de la situazion te la Palestina diretamenter da volontères e referentes de Operazione Colomba. La cena la é a oferta libera destinèda ai projec porté inant te la Palestina; duc é envié a tor pèrt e no serf se prenotèr.
De più su La Usc stampèda de en vender ai 23 de firé.
(Lucia Gross)
