La Usc di Ladins

Se à serà su l projet TRAME, Turism Inclusif Responsabol e servijes de Comunanza Azessiboi travers n Model de Empowerment sozièl, con gran suzes de partezipazion e de obietives arjonc. Chest projet é nasciù da la colaborazion anter enc publics, sociazions del terz setor e sogec privac (Comun General de Fascia, Coprativa Oltre, Garni Villa Mozart, Trentino Social Tank) con la partezipazion de istituzions e sociazions del post (Comun de Cianacei, ApT de Fascia, Coprativa sozièla INOUT e sociazion Bambi) e finanzià da la Fondazion Caritro, da la Provinzia de Trent, dal Consei de la Autonomies Locales a da la Fondazion Franco Demarchi. TRAME à tout ite persones con e zenza desabilitèdes te n percors condividù de crescimonia, autonomia e partezipazion.

»Ma TRAME no l é stat demò n projet che se metea dant de sostegnir n turism responsabol, azessibol e inclusif – à dit Paola Rasom, responsabola di Servijes sozio-assistenzièi del Comun General de Fascia – l é doventà n entreciament, descheche disc ence l inom, de relazion, de oportunità, vijion condividude e responete concrete ai besegnes reai de la comunanza. I resultac de chest projet defat rejona da soi e i é de gran valuta.«
Con TRAME l é stat endrezà laboratories, evenc, workshop e scontrèdes anter desvaliva generazions per se baratèr idees e scomenzadives, ence tel temp de fora sajon per ge dèr l met a la families de la val de tor pèrt. Amò apede l projet à chierì de responer ai besegnes educatives e de didament a la families col sporjer soluzions concretes e benefizies per duta la comunanza.

De più su La Usc stampèda de en vender ai 27 de jugn del 2025.


 (MCI)