La Usc di Ladins

L secondo Consei General de chesta neva legislatura é stat chiamà ite en lunesc ai 28 de messèl per aproèr vèlch mudament tel bilanz e tel regolament del organich. Al orden del dì ence la nomina del raprejentant del CGF tel Consei de aministrazion de l’Azienda per l Turism de Fascia: la maoranza à proponet Matteo Iori, inom che é stat aproà zenza discuscions da duc i 27 conseieres prejenc.
Al scomenz la presidenta Tea Dezulian à dat comunicazion de la formazion di Gropes consiliares. La doi listes che ai 4 de mé aea sostegnù l procurador Edoardo Felicetti les se à metù adum tel grop de maoranza ‘Fassa Autonomia’ e chest grop, apede al medemo Procurador, l tol ite 6 di 7 conseieres lité te Fassa (Lara Battisti, Matteo Iori, Manuel Mazzel, Samuel Lazzer, Marco Pederiva e Gianluigi De Sirena) e i 3 lité te Autonomia per Fascia (Bernardino Chiocchetti, Alberto Compagnoni e Marco Felicetti); a chisc se à jontà 7 di 12 nominé dai Comuns, duc de la Val de sora e più avisa i raprejentanc de Mazin Simone Congiu e Carlo Deluca, chi de Ciampedel Ezio Croce e Matthias Sieff e un di 2 nominé a Cianacei, Luigi Marchetti. L portaousc de chest grop l é Marco Pederiva.

Se pel lejer de più su La Usc stampèda de en vender prum de aost, che se pel troèr ence te la boteighes de sfoes de la valèdes ladines.  (Lucia Gross)