La Usc di Ladins

»Gé les veide desche persones straordenères« à dit la regista Giorgia Lazzarini tel prejentèr »Straordinarie«. L documentarie conta la vita da vignidì e l’esperienza de 6 eles che fèsc jir uties da soules. La testimonianza de Lazzarini, portèda dant en vender passà te chino Marmolèda tel chèder de la scontrèdes »Canazei Campo Base« rencurèdes da la giornalista Elisa Salvi, la se à enterzà con desvaliva scenes del docufilm, con la paroles del produtor Antonio Visinali e de Francesca Debertol de la utia Contrin, una de la protagonistes che à cernù chest percors de vita tant segnificatif. »L é femenes straordenères che à cernù de lurèr sa mont, troan na gran forza e determinazion. Con sie empegn e dedizion les doventa la vardiènes de chisc lesc maraveousc, desmostran l coraje de la femenes te n’encèria che, per tradizion, la é di omegn«.
Con n lengaz sinzier e autentich, l docufilm moscia la vita reèla de 6 eles che fèsc jir n refuge te località più o manco cognosciudes. Eles l é Anna Bortoletto (Ref. Grassi), Valeria Pallotta (Re Albert I), Elena Bergamin (Sasso Bianco), Marika Freschi (Pordenone), Roberta Silva (Roda de Vael) e Francesca Debetol (Contrin). Les à portà dant sia testimonianzes en cont de coche les se à arvejinà a la mont, de sie stel de vita, de momenc senestres leé al ses, a l’età e a la familia.

Se pel lejer de più su La Usc stampèda de en vender prum de aost, che se pel troèr ence te la boteighes de sfoes de la valèdes ladines.  (Nicoletta Riz)