La Usc di Ladins

La se à avert col rumor del elicoter la scontrèda te piaz Marconi en jebia ai 7 de aost, apuntament de la rassegna ‘Cianacei Campo Base’. Per grazia chest’outa l rumor no vegnia dal ciel ma dal gran scherm tedant cèsa de Comun. N gran numer de eies curiousc à podù ge vardèr a la proiezion de na pèrt del docufilm ‘Il Nucleo’ del giornalist de la Tgr de Trent Andrea Selva che é stat prejentà con suzes al Trent Film Festival. N docufilm che conta l lurier del nucleo elicoteres de Trent con intervistes a piloc, dotores, infermieres, studafech, tecnics de elicosors, tecnics del socors da mont e mecanics, per descorir n servije che ogne dì, ence te noscia valèdes, fèsc la desferenza anter la vita e la mort. La setemènes de la Madona de aost l é cheles più pienes de jent e ben de spes sozede che valgugn se fae del mèl o reste empegnà sun noscia pizes. Ma chest an la situazion é amò piora.

»Chest l é l moment più empegnatif per la machina del Socors – à dit Piergiorgio Rosati comandant del Nucleo Elicoteres de Trent che ensema a Maurizio Dellantonio, president nazionèl del Socors da Mont e Speleologich, à tout pèrt enstadì al debatit te piaz de Cianacei col regist Andrea Selva, vidà da Elisa Salvi. Te chisc dis se passa defat da 500 mile a beleche 2 milions de sentadins con i turisć che rua sun dut l teritorie. Chest comporta a n gran smaorament di socorsc sa mont, ma ence su la strèdes con l trafich maor de moto e rodes e ence percheche la jent se sent mèl per via del ciaut.«

»I dac ne disc che tel ultim mes sun dut l tegnir nazional aon fat n 20% de intervenc de più – à dit l president Maurizio Dellantonio – con beleche l 20% de morc che é rué al numer de passa 100.«

La rejons les é desvalives. »L bon temp che envia la jent a jir sa mont – à spiegà Dellantonio – n mulge de persone defat à spostà soe vacanze dal mar, ma trope no é enjignade e le fasc robe sora soe possibilità. No duc ben segur – l jonta apede – ma na bona part. I dac de chest istà ne disc che l 40% de chi che chiama l elicoter no se à fat mal, magari i à demò magnà massa. L socors se l chiama canche se à de besogn, sion duc volontadives e se mef na squadra entria; noi entervegnon semper soraldut se l é da sera o muda l temp, l é ben fat che la persona, ence no la se à fat mal, la vegne portada al segur.«

De più su La Usc stampèda de en jebia ai 14 de aost del 2025

 (Monica Cigolla)