La Usc di Ladins

Ve meton dant chesta setemèna n aprofondiment che revèrda i camper che stèsc soranet olachemai: ti piazamenc enlongia strèda a jir sui jouves, ti piazai sun Sela, sun Pian de frataces de sora, sun Schiavaneis, sun Fedaa, te Ciamp Trujan, adertura se n veit vèlch outa ti piazai de paisc. Se trata de n fenomen che da n istà en l auter doventa semper più grief, sentù da la jent, tant che se n à rejonà te Consei de Comun de Cianacei en mercol ai 30 de messèl.

La costion la é stata uzèda fora dal conseier de maoranza Luciano Fosco canche se à rejonà de ge dèr l met en deroga a la Frazion de Cianacei de drezèr fora n teren per realisèr n’area de sosta atrezèda (chiò apede n aprofondiment col capofrazion, ndr) ló dal Pian de dò l Col, apede Pian de Schiavaneis: »L é na situazion vergognousa per la parbuda de nosc Comun: l é camper daperdut che lascia scoadies, per no parlèr de furgons modifiché, zenza omologazion e zenza èga pazes. I stèsc soranet ence olache l é descomanà e i Polins no i é bogn de fèr assà controi« l à dit Fosco.

Se à avert coscì n bel confront anter maoranza e mendranza: l é stat portà dant sibie la problematiches vindedò che proponetes. Roberto Guglielmi à sotrissà coche la situazion sie vigni an più pesoca, portan trafich e scoadies, zenza che nesciugn pae la steora de sojornanza. La situazion no la é neto nia sorida da gestir per i aministradores cauja soraldut la normatives del Codesc de la strèda: l é stat dit che se à la mans leèdes, serf che la Provinzies de Trent e Busan se confrontee per troèr na soluzion. Nos aon domanà fora l ombolt Giovanni Bernard.

Co éla la situazion a Cianacei?

Giovanni Bernard Stroz se veit camper che se ferma te la piazoles e ence te paisc. No l é che no se vel l turism leà ai camper, ma i ne crea dejèjes: vèlch outa no i é atrezé, soraldut chisc van e furgons no i à i bagnes e i lascia stroz scoadies. L stradon é en gestion al Servije de la Provinzia desche ence la piazes enlongiajù; la strèdes forestales les é enveze de la Frazions ma per solit chiò l é l scartabel che descomana l azes.

 

Fajede controi?

I fajon, ma tel respet de la normes del Codesc de la strèda. Sun dut l teritorie de comun l é descomanà per duc fèr camping, te ogne area tant publica che privata. Fèr camping vel dir per ejempie averjer na tenda e trèr fora antenes, meter ju i peoc e la scèles. La normativa la dèsc l met de parchejèr e l é descomanà desćiarièr e la sosta per camping.

N camper l é desche n auto - ne disc i polins - e donca i à l derit de se fermèr per l Codesc de la strèda. No se pel fèr sanzions se no se desmostra che se trata de camping.

 (Nicoletta Riz)