La Usc di Ladins

Te la scontrèda te piaz per la rassegna 'Canazei Campo Base' de Elisa Salvi con la partezipazion de Piergiorgio Rosati, comandant del Nucleo Elicoteres de Trent e de Maurizio Dellantonio, president nazionèl del Socors da Mont e Speleologich, apede a moscèr l docufilm Il Nucleo de Andrea Selva, l é stat uzà fora vèlch consei emportant per la jent che va sa mont. »A outes l é senester troèr fora la persona che é tachèda sun n parei, o tel bosch, o te n post sconet – à dit Rosati - ge volessa semper aer guanc dai colores forc; l fonin pel ve salvèr la vita, vardà che l sie ciareà e metelo te guofa no te prossach ajache podassade ve l perder; durà l fonin demò per fèr la chiamèda, no chiamà sobito do parenc e amisc ma spetà l contat del pilot che ve domanarà informazions; se no l é segnèl, chiamà istesc l 112 ajache l se colea a ogne operator telefonich; miec fossa aer desćiareà l App GeoResQ che ne deida a troèr chi che é tel pericol ence zenza chiamèr.«
»Mencia la prudenza soraldut anter i joegn - à jontà apede Dellantonio. Proprio chisc dis è fat n rechiam sul efet di social che no l é l strument giust per far cognoscer la mont. Basta n temporal per mudar deldut n troi o na ferata respet a canche se l’à veduda sun n retrat o te n video. L é da n mulge de egn che l dijon: ge vel dorar l bon sens, guanc e peamenta adaté e far chel che se é bogn de far. Domanar consees a la jent del post, ai menacrepes e ben segur semper vardar l meteo.«

De più su La Usc stampèda de en jebia ai 14 de aost del 2025  (MC)