La Usc di Ladins

En ocajion del dì internazionèl de la fotografia, en mèrtesc ai 19 de aost 2025, la Majon di Fascegn vel recordèr Flavio Faganello (1933-2005) con n recital dut al femininche vegnarà portà dant te sala grana del veie Tobià de la Pieif. Chest fotograf e fotoreporter trentin l é stat bon de fèrmèr te sie click de gran sensiboltà e pascion, l temp e l mond bacan da enlouta (fin ite ti egn Otanta), che jia inant te anter la stentes e la fadies de la vita da mont te Fascia e te duta la region.

Tel zenter de sia opera, fona, poetica e tel medemo temp ence de documentazion, l à metù la femenes tel essenzièl de sia ejistenza, te mez a n ciamp a semenèr, su na mont a restelèr, co la besties a vejolèr, te majon a fèr i fac. E, tel les tor ju, Flavio Faganello chesta femenes l les à enlumenèdes.

Per recordèr chest gran om e artist, do vint egn da sia departida, l é nasciù l recital per talian »Le donne nelle stagioni della montagna - La femenes te la sajons da mont«, pissà e rencurà da Chiara Turrini. Te chesta creazion, la fotografies toutes fora dal liber de Flavio Faganello »Con voce di donna« (Cierre Edizioni) e proietèdes sul schermo, les ciapa vita tres la oujes de Chiara Turrini e Beatrice Scartezzini, che met apede e mesceida, te chest recital, pizèdes poetiches de Verena Faganello e de Franco de Battaglia, poejies de Marco Pola, tesć originèi de Stefania Scartezzini e museghes spilenèdes al piano da Lorenza Anderle e al violoncel da Veronica Beber. L apuntament l é, doman, mèrtesc ai 19 de aost da les 9 da sera.