La Usc di Ladins

L’idea de fèr fora na Ciasa de la Musega a livel de val tel frabicat de la veia scola populèra de Poza, olache à jà sia senta l Cor Valfassa, la era peèda via ti egn passé da n confront anter l ombolt de Sèn Jan Giulio Florian e la Scola de musega Il Pentagramma. L enjegner Norbert Bernard da Pera era stat enciarià de fèr l projet preliminèr che l é stat portà dant a la Region; l assessor regionèl Luca Guglielmi lo à valutà a na vida positiva e l é stat aproà n finanziament de 3 milions e 600 mile euro sun n cost pervedù de 4 milions e mez.

Ades l enjegner Norbert Bernard del studie ‘Fassa.Pro 360°’ à realisà l Projet de Fatibilità Tecnica e Economica adum con n team de tecnics: l architet Nicola Vanzetta e per la pèrt di impianc Paolo Vadagnini e Michele Dellantonio. Per la pèrt acustica l Comun de Sèn Jan à enciarià la firma Sonitus e con chisc esperc l é stat cernù duc i materièi e la carateristiches per l isolament de la sales per la proes e per arsegurèr na bona acustica, che ajache se trata de musega la é fondamentala. Soraldut per chest aspet l cost del projet é cresciù, ruan a 5 zirca miliogn e 850.000 euro.

Ai 23 de setember l PFTE de la Ciasa de la Musega, che l é stat fat tel respet de duta la desposizions e l pel vegnir conscidrà beleche definitif, l vegn tout dant per l’aproazion dal Consei de Comun de Sèn Jan, descheche l é pervedù per la operes che va sorafora l milion de euro.

Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Lucia Gross)