La Usc di Ladins

La conferma che l enteres e la valuta de mic e ric veiores pel jir sorafora i confins de noscia valèdes l é ruà te chest meis de setember ence da Roma, avisa da Genzano, olache tel chèder de la VII edizion del Festival de Antropologia e Storia de la Religions »Nella terra di Diana« ai 13 de setember Fabio Chiocchetti l é stat envià belapontin a tegnir n referat sul liber ‘Letres da Larcioné’, uzà fora da Ulrike Kindl te sie intervent tel Dì dla Cultura Ladina.
Te chest liber elemenc jà cognosciui travers l Wolff e l de Rossi, desche la lejenda de la vivèna e l cian, ciapa dut auter spessor e emportanza travers la letura de la verscion più fideila e cristalisèda de la tradizion orala sporta da la letres del Calligari e l'analisa de Chiocchetti su pèrts de gran potenza desche la invocazion a la divinità sun Col de Mé e la malediscion de la vivèna scarèda. La descorida e la spiegazion de chisc elemenc à soscedà ence a Roma gran enteres e discuscion, conferman la valuta de chest studie, che era jà stat premià a la 12^ edizion del pest »Salva la tua lingua locale« dedicà a Tullio de Mauro.

 (LG)