La Usc di Ladins

La se fèsc cognoscer semper de più de gra a si emportanc resultac la Scola Interregionèla de ciantia e teater de la Sociazion »Le Muse e le Dolomiti«. En ocajion de sia pruma ejibizion sul teritorie nazionèl, de mé de chest an, i studenc de livel arvanzà se à merità n pest de fascia d’arjent al prestigious concors ‘F. Gaffurio’ te la provinzia de Lodi. E dapò no desmention l spetacol ‘Brundibàr’ portà dant ai 5 de aost te teater de Navalge, n projet dedicà ai 80 egn da la Seconda Vera, che à abù gran suzes de publich e de critica.
»Proprio per responer a la domana semper maora – disc la presidenta e Maestra Oda Zoe Hochscheid - da chest uton la Scola aur na neva senta te Fascia, ló da la Ciasa de Noscia Jent a Poza. I studenc tol pèrt a na lezion en setemèna duc ensema te sia senta e dapò, en ocajion de conzerc e spetacoi, i vegn metui ensema te n ‘Cor Teatral Dolomitich’ de oujes biences e de joegn. Per fèr cognoscer noscia oferta formativa e artistica – disc amò la Maestra Hochscheid - via per dut l meis de otober verjon la sentes con lezions debant per duc i bec e la bezes dai 6 egn en su.
Per tor pèrt a la lezions no l é de besegn de aer jà cognoscenzes de musega: pel proèr duc chi che à estro de se goder tras l ciantèr e l spilenèr ensema. Duta la informazions se pel les troèr sul sito www.musedolomiti.it opura podede chiamèr al 342 9147711«.

De più su La Usc nr 37 dai 27 de setember del 2025. L sfoi é da poder comprèr ence te la boteighes dai sfoes de la val  (Monica Cigolla)