La Usc di Ladins

La Coa di picioi de Ciampedel la é vertia. L Comun, con sie tecnich Erwin Lorenz e col didament del Consorzie di Comuns per endrezèr l apalt di lurieres, à venciù la gran endesfida de portèr a compiment dut l iter e la strutura amò del 2025, ti tempes pervedui per aer l finanziament del PNRR. Chest l é jà n bel merit, ajache n muie de etres projec no é rué a zil tel temp consentì. De mèrz de chest an l Comun de Ciampedel ge à manà la documentazion de fin lurieres e agibilità al Comun General de Fascia, a chel che ge pervegn de dèr sù la gestion del servije. Ades la strutura é vertia tant daite che de fora, l é ruà ence i aredamenc, che é stac enjigné dal Comun vardan a coche l era stat endrezà la Coa de Soraga. Ampò chest uton l servije no podarà peèr via. La gestion defat cogn vegnir data su dal CGF travers n bando e ajache la speisa é grana no l pel l fèr diretamenter. Ma l'APAC, l'agenzia provinzièla di apalc, programea sia atività aldò de la prenotazions fates dantfora vigni sie meisc, l Procurador à dit che l CGF no à amò fat nesciuna domana de prenotazion e donca somea che l bando podarà vegnir enjignà demò l an che vegn. L é n pecià che do l gran lurier fat dal Comun per portèr a compiment la strutura più prest possibol l servije vegne entardivà. Sun chest l é stat manà ite al Consei General ence na interogazion da man de la conseiera Mirella Florian.

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)