Gran emozion per l ultim salut a don Carlo Crepaz te gejia del Sacro Cher. L Piscop Tisi à vidà la zelebrazion e recordà l preve fascian ence l dì do, te la messa grana de Sèn Vile tel dom e a Pinzolo.
»Die mie, Die mie, perché me aste arbandonà?« Chesta invocazion à ressonà te gejia del Sacro Cher en jebia ai 25 de jugn, al scomenz de la messa de cumià cristian per don Carlo Crepaz, mort de colp de 61 egn doi dis dant. En vea de la festa grana per l patron de la Diozesa, l Piscop de Trent don Lauro Tisi é ruà a Cianacei e apontin con chesta paroles l à orì la zelebrazion. Sia ousc forta é doventèda, l à dit el enstes »na ousc serèda da n gran peron, desche chel metù dedant al sepolcher de Gejù. Me mencia la paroles. Somea che Die no l sente l chiam cruzià de sia Gejia che stenta a troèr n davegnir«.
Dedant utèr l era n gran retrat de don Carlo e entornvia zirca trenta preves e religiousc: apede al Piscop
l vicare general de la Diozesa don Claudio Ferrari, l piscop miscionarie Mariano Manzana, don Mario Bravin responsabol de duta la parochies de Fascia e don Albino Dell'Eva de 12 parochies de Fiem, preves rué da dut l Trentin: fascegn, compagnes de percors, ence africhegn. Apede utèr l confalon del Comun de Cianacei e raprejentanzes de gropes e sociazions de Fascia e ence de autra valèdes olache don Carlo à fat servije ti egn. E n muion de jent, che à fat la couda per lascèr sie inom sul liber de la firmes fora de gejia e dapò à ciapà post no demò daite ma ence sot trei gregn gloriec enjigné tel piaz de fora per se parèr dal soreie fers. Jent che se à binà da duta Fascia e dal Trentin per palesèr recognoscenza e afet per don Carlo, che do 12 egn de miscion tel Ciad l é stat pèster forin Fiem, te la Val de Non e i ultimes egn te la Val Rendena.
La emozion a l recordèr à abù la soramessa endèna la perdicia del Piscop Tisi.
Podede lejer dut su La Usc stampèda dai 3 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper) (Lucia Gross)
