La Usc di Ladins

Cun la fin de jügn él gnü lascé alsavëi i inoms dles davagnadësses y di davagnadus dl »Opus Klassik«, un di reconescimënc plü importanc ti Paisc Todësc, dedicá ala musiga classica. Dal 2018 incá él la »Gesell­schaft zur Förderung der Klassi­schen Musik GmbH« che premiëia vigni ann interprec, direturs d’orchestra, componisć, ensemble, talënc jogn y registraziuns singoles che s’á alzé fora sön le panorama dla musiga classica por la cualité artistica y la forza inovativa.

Danter passa 680 candidatöres á la iuria cernü iniann por rové ala seleziun finala di davagnadus, partis sö te 30 categories desfarëntes. Por le pröm iade tla storia röia le »Opus Klassik« a contat strënt cun la Val Badia, portan dancá na usc ladina: al é chëra dl bariton da La Val Andrè Schuen, che podará pié do le pest y la nominaziun de »cian­tarin dl ann«. La surandada di pesć gnará a s’al dé a Berlin danter i 10 y i 11 d’otober, olache i musizisć y i cianta­rins premiá rovará adöm te na sëra de gala.

Le reconescimënt de prestisc alza fora süa prestaziun ezelënta tl ciamp dla musiga classica: sides da ciantarin d’opera co tl »Lied« slomina le bariton da La Val dan i edli dla critica internazionala.


Liede deplü tla ediziun nöia de La Usc di Ladins de vëndres ai 3 de messé!