La Usc di Ladins

L é chi che scomenza sie viac te la vita senté ju su n sental sorì de n bel gran auto, con n sciofer che vida o amancol n navigator che moscia la strèda, e chi che enveze fin dal scomenz se troa sun n troi adort e pien de pericoi, che bèsta nia per meter n pe tel post falà e sluzièr ju per na riva erta, olache l é più fazile jir semper più en ju che esser bogn de se tirèr su deretorn. Ma pel sozeder ence che dal sental sorì se rue fora de strèda percheche l sciofer vèrda l fonin, l navigator no rata o se vel jir massa coran: ge vel pech per fenir fora de strèda, bèsta che mence vèlch e se rua fora dal dret troi.

L é dut vites olache l é mencià vèlch, cheles che n picol grop de persones che é serèdes via te la prejon de Trent à contà en lunesc ai 24 de aost a Poza, te Piaz de Comun; protagonisć e tel medemo temp autores de sia autobiografia, i ge à contà a la persones che à volù jir a i scutèr vèlch capitol del viac de sia vita.
I 'letores' che à tout su l envit del Comun de Sèn Jan ge à palesà l rengraziament dal cher en fora a chi che ge à dat l'ocajion de tor pèrt a chesta esperienza, en particolèr a l'assessora a la cultura del Comun Mirella Florian, che à tout su e portà inant chest projet de »Biblioteca vivente« de »Liberi da Dentro« ensema coi volontères de la desvaliva sociazions partners.

De più su La Usc stampèda de en vender ai 28 de aost del 2026

 (Lucia Gross)