La Usc di Ladins

200 grami de farina, 50 grami de zucher, 20 g de smauz, ¼ de litro de lat (fret), 3 vof, n bicerin de sgnapa e doi piziade da sal.
Prima de dut se met su l ont a se saudà, che pol ester oio de barbagigi o strutto. Po se zarn i ros de vof da le ciare, e nte na scudela fonda se sbat i ros col zucher con na scoeta e n frego a la ota se jonta ite la farina e l lat, l smauz delegà e n ultima la sgnapa e na piziada de sal: n ultima à da vignì fora na pasta pitost pesoca. Nte n autra scudela se monta le ciare a nef bela ferma con na piziada de sal e n cazuol de zucher, e se le jonta a chel autra pasta: l é da le smesedà n pressa, dal bas n aut, parceche no le se smonte, e duorà la pastela delongo.
Co l ont l é ciaut giusto (no massa puoch che le fortaie le ven fora onte, no massa ciaut che senò le se bruja) se ciaria l priul e se fas jì ju la pasta ntel ont a dijigné na spirale dal zenter n fora. Canche la fortaia la é cota de sot, se la gira con na ciaza e se la fas cuoje da chel autra banda, po se la ciol fora e se la met sun na carta a se suié. Per le otà saurì e per fà na bele fortaia a forma de sciuois l é meo duorà na padela picola con puoch de oio, senò la pasta la scampa, e no l é fà tomà la pasta sora de autra pasta, senò no la se lassa cuoje bela valiva.

De plu tla edizion stampeda de La Usc di Ladins o sun l e-paper a paiament www.lausc.it/e-paper