La Usc di Ladins

N juebia dl'ena passeda àn fat sauté tl aier n puron sa Bula, sëura La Vies. Ma per ntënder la gaujes de chësta azion, messons jì de reviers ai 11 de juni, ntëur la 23:00, canche ie unii cherdei i Destudafuech de Runcadic, ajache na familia à audì tuman ju »n grumon de purons y sasc sëura si cësa sa Bula, sëura La Vies«, nscila nes conta Walter Alfarei, assessëur per la frazions ladines de Ciastel y cumandant di Destudafuech de Runcadic. I uemes ie jic su y à udù l gran pricul. La rë de prutezion fova bele desdruda y l univa mo ju truep purons. Nsci à i destudafuech evacuà chësta cësa y menà la familia a durmì te n hotel.
Inant nes conta Alfarei che »l di do ie la situazion unida mo plu grieva, ajache l ie ju na gran smueia che à purtà ju na gran cuantità de material. Nsci iel julà su, cun n joler, n geologh deberieda cun funziuneres dl Chemun de Ciastel, y à udù n gran puron che manaciova de unì ju. Chësc puron fova propi sun na smueia che fossa unida ju te chisc tëmps cun na gran plueia. Perchël à l Chemun de Ciastel riesc nciarià na firma per mëter n segurëza y fé sauté tl aier l puron.

L articul ntier sarà da liejer tla edizion nueva de La Usc di Ladins de n vënderdi ai 5 de lugio. 

Bruno Maruca