Dlijia: Siur Klaus surantol ince Rina y Antermëia
Le ciol vëgn tres plü strënt: cun le 1. de setëmber él indó cotan de mudaziuns aministratives tla dlijia dla Val Badia
La Diozeja de Balsan/Porsenú á publiché les mudaziuns de personal che jará en forza cun le 1. de setëmber 2020, y da chëstes vëigon che ara vëgn tres plü strënta cun i proi te nosta valada. Siur Klaus Sottsass, che é ploan d’Al Plan y vicar da La Pli, San Martin de Tor y Lungiarü, surantolará ince la responsabilité aministrativa y sará insciö vicar dles ploanies da Antermëia y Rina. Iló él siur Paul Campei che á arjunt bele l’ann passé i 75 agn: chësc ó dí che siur Paul gnará deslié dala inciaria da ploan dles döes cöres, por deventé curat a Al Plan, La Pli, Rina, Antermëia, San Martin y Lungiarü. Siur Heinrich Perathoner, che é al momënt curat d’Al Plan, La Pli, San Martin y Lungiarü, vëgn ince nominé lapró curat da Antermëia y Rina. La inciaria da curat ó dí en sostanza che chisc proi jará tles cöres nominades a daidé fora. Y cina che al é proi a daidé fora, ne sintiarán tla pratica nia dër tröp, mo an vëiga che les mudaziuns vëgn, y vëgn ince tres plü debota. (pablo)
Galaria retrac
View the embedded image gallery online at:
https://www.lausc.it/valedes-ladines/val-badia/11961-dlijia-siur-klaus-surantol-ince-rina-y-antermeia#sigProIdbd3d8b3266
https://www.lausc.it/valedes-ladines/val-badia/11961-dlijia-siur-klaus-surantol-ince-rina-y-antermeia#sigProIdbd3d8b3266