La Usc di Ladins

Baié chisc dis de manifestaziuns culturales y artistiches pé utopich, ma che la vita messará indechëltan jí inant y ince n isté nü gnará, y an spera che l’isté vëgnes cun les portes davertes. Intratan ván inant cun l’organisaziun de evënc, un de chisc é la mostra "ester ladins" a chëra che al s’á anunzié da tó pert n bel numer de 30 artistes y artisć.
Tres n surapost cun Magdalena Messner y Elena Liberatori dl MMM Ripa cun sënta tl Ciastel da Bornech y le grup de laur por la mostra "ester ladins" preodüda por l’isté/altonn 2020, él gnü destiné deplü locai y sperses alaleria por lascé jö les scultöres, i chedri, i retrac, les istalaziuns y i videos di artisć che s’á anunzié. La daurida dla mostra é preodüda por le vëndres ai 17 de messé 2020 y ara dorará cina la fin de setëmber 2020.

"Ladiniaday"
Tratan chësta spana de tëmp dla mostra EPL-Ert por i Ladins dessel gní metü da jí, sön iniziativa de Magdalena Messner, danter l’ater fia de Reinhold Messner, deplü manifestaziuns dedicades ai Ladins sciöche mënder popul de nüsc raiuns dolomitics, insciö le "Ladiniaday" ai 15 d’agost 2020 cun de vigni sort de mostres söla storia y cultura ladina, informaziuns diretes y ince spetacui musicai y leterars, y cerces de ladin por pici y gragn. Lapró saral ince da ciafé söl post spezialités gastronomiches ladines.

Festival de rock y pop ladin
Por amez setëmber, tratan na findledema ciamó da fissé plü avisa cun le de, él söl program n dé de musiga de ciantauturs y grups rock-pop ladins, desco ince letöres de poec y scriturs ladins.

Speranza
Odëi danfora i tëmps "post coronam" ne pó sëgn n iade degügn, mo les porsones á speranza che l’epidemia pois gní arferada tres plü y plü. Che l’ert á val’ da nen fá chisc dis cun speranza nes dij un de sü fins plü antics y essenziai: chël da se mostré y gní mostrada.