La Usc di Ladins

Tl comun de Mareo án pa n iade da sćiampí cun roes. Do la grana gnüda jö a Ciamaor y Ciastlins, án sëgn ince da lauré tl pice paisc da Rina. Bele dan chi 10 dis êl gnü jö material te Val de Paröa, na tëmpla da chëra che al rogor fontanes, che vëgn a löm te n pice rü. Le pröm iade se l’ân cavada cun l’aiüt di lauranc de Comun. Atramënter éra stada le vëndres passé, olache al é gnü jö n toch de tëmpla, che á mené ega y paltans cina jö tla strada da Ciornadú, y inant püch sura la strada provinziala. Iló ál orü ester l’intervënt di Stödafüs da Rina y ince de na dita por condü demez material. Rodunt incö ai 28 de messé él sté n surapost cun l’assessur da Rina Alessandro Huber, Chi dai Rüsc, Verdabosc y Ispetorat Forestal. Iló án baié de co che an dess jí inant. Huber nes á splighé che intratan él Chi dai Rüs che surantol le pröm intervënt, dedó sarál da fá n proiet por mëte en segurëza le raiun y canalisé aladó les eghes.  (pablo)