Sport, gastronomia y glamur a fin de bëgn

Data

11 de agost 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ala "Charing 2020" él gnü coiü adöm 50.000,00 euro por l’Istituto Serafico a Assisi che promöi y desfira ativité riabilitativa, psicoeducativa y assistënza sozio-sanitara por mituns y jogn adulc cun dejabilités fisiches, psichiches y sensoriales
Al s’á stlüt jö ai 2 d’agost la manifestaziun "Charing: Charity & Sharing in alta quota" (carité y partí alalt) a Corvara, con na morona de ativités liades ala pratica dl golf pro le Golf Club Alta Badia, n ciamp da 9 büjes a 1700 metri, y por les strades da Corvara en gaujiun dl "street golf".
Ala pert é stá en chësc iade jornalisć y sportifs profescionisć dl monn dl golf, Palé, schi y ziclism sciöche Dorothea Wierer, Concetta Bonaldi, Jonatan Binotto, Claudio Chiappucci, Lorenzo Dallari, Ernesto De Mattia, Beppe Dossena, Giacomo Erlacher, Roberto Erlacher, Kristian Ghedina, Roberto Gilarduzzi, Michael Mair, Paolo Monelli, Michele Paramatti, Guido Paur, Pepi Ploner, Alex Prast, Costantino Rocca, Alfred Runggaldier, Marcello Santi, Andrea Seno, Hannes Zingerle che s’á moseré – bele do le suzes dl ann passé – söla Gran Risa, te n testa a testa de golf desco n paralel de schi.
I dis da golf s’á stlüt ia cun jori panoramics te elicoter sura les Dolomites, la premiaziun di mius y l’intervënt de dui ghesć speziai, Simona Atzori – artista pituria, balerina y scrituria, y Dorothea Wierer, biatleta taliana che é gnüda trëi iadi campionëssa mondiala y dui iadi pröma tla copa dl monn generala de biatlonn.
Por apascenté ince la fan fisica él gnü ponsé a döes cënes: la pröma cun ciasadafüch tipica südtiroleja tla Ütia da Jimmi, tl restorant La Stria y sön Runch, y la secunda cëna gourmet a ot mans cun chefs conesciüs desco Norbert Niederkofler, Giancarlo Morelli, Andrea Irsara y Ilija Pejic.
Y al resta ince val’ dlungia ai bi recorc: la manifestaziun da en chësc ann á coiü adöm bëgn 50.000,00 euro te na findledema sora, spënores che ti é gnüdes surandades al Istituto Serafico de Assisi, che promöi y desfira ativité riabilitativa, psicoeducativa y assistënza sozio-sanitara por mituns y jogn adulc cun dejabilités fisiches, psichiches y sensoriales.  (Iaco Rigo)